धनुषा । नेपाली कांग्रेसका नेता अफ्ताब आलमको रिहाइको दिन सम्झँदा मन अझै भावनाले ओथम्बिन्छ। त्यो दिन म आफैँ कारागार पुगेको थिएँ, उहाँलाई स्वागत गर्न, भेट्न, र उनको लामो पीडादायी कारावासको अन्त्य साक्षी बन्न । साथमा उहाँका छोरा मुन्ना आलम, स्थानीय जनप्रतिनिधि, कांग्रेस नेता–कार्यकर्ता र शुभेच्छुकहरूको ठूलो भीड थियो ।

कारागारको ढोका नखुल्दै मानिसहरूको अनुहारमा उत्सुकता, राहत र खुशी मिसिएको भाव थियो। जब अफ्ताब आलम बाहिर निस्कनुभयो, सबैको आँखा रसाए । ८ वर्षको जेलजीवनपछि स्वतन्त्रताको पहिलो सास लिन पाउनु स्वयम् एउटा नयाँ जीवन जस्तै थियो ।

गाडीमा बसेपछि उहाँका शब्दहरू थामिन सकेनन् । “जीवनमा कसैलाई जेल नहोस्, जेल नर्क हो,” उहाँले भन्नुभयो, आवाज भक्कानिएको थियो। “म बिना कसुर आठ वर्ष बसेँ । कमिला पनि नमार्ने मान्छे मानिस मार्ने भन्ने आरोप लाग्यो ।  धर्म, आस्था र इमानप्रतिको उहाँको विश्वास अदम्य थियो । “सबैको धर्म महत्वपूर्ण छ, धर्मसँग डराउनुपर्छ। मेरी श्रीमतीले हजमा मेरो लागि दुवा गर्नुभयो, म सोही दिन रिहा भएँ । अल्लाह, भगवान, ईश्वर जसलाई भनौँ, उहाँहरूकै कारण म बाँचेर निस्किएको हुँ ।” ४ किलोमिटरको यात्राभरि उहाँले यही कुरा बारम्बार दोहोर्याइरहनुभयो । ती वाक्यहरू केवल शब्द थिएनन्,  ती ८ वर्ष लामो वेदनाको निचोड थिए ।

“जेलमा धेरै निर्दोष छन्, उनीहरू बिना कसुर जीवन बिताइरहेका छन्,” उहाँले भन्नुभयो । “सरकार र प्रशासनलाई धेरै बुझाउने प्रयास गरेँ, कसैले सुनेन । अब म स्वतन्त्र छु, तर जीवनका सुनिला वर्ष जेलमै बिते । यो पीडा मर्नेसम्म पनि रहिरहनेछ ।”

कांग्रेसभित्र ‘आलम परिवार’को ऐतिहासिक योगदान

अफ्ताब आलमको रिहाइले व्यक्तिगत मात्र होइन, राजनीतिक सन्देश पनि दिएको छ। ‘आलम परिवार’ नेपाली कांग्रेसको गौरवपूर्ण इतिहास बोकेको परिवार हो, त्यो इतिहास जुन देशको प्रजातन्त्र, समानता र न्यायको आन्दोलनसँग गाँसिएको छ । राणा शासनको अन्त्यदेखि बहुदलीय लोकतन्त्रको पुनःस्थापनासम्म यो परिवार अग्रपंक्तिमा रह्यो। शेख इद्रिस, देशका एक असल प्रजातान्त्रिक योद्धा, यस परिवारका प्रमुख स्तम्भ हुन्। उनको समर्पण, इमान र राष्ट्रप्रेम कांग्रेस मात्र होइन, सम्पूर्ण नेपाली जनताको साझा सम्पत्ति हो ।

आज, जब अफ्ताब आलम निर्दोष प्रमाणित भएर फर्किएका छन्, प्रश्न उठेको छ, के नेपाली कांग्रेसले आफ्ना त्यागी, सिद्धान्तनिष्ठ र इमानदार नेताहरूको सम्मान गर्न सक्नेछ? कि पुनः त्यस्ता योगदान बिर्सिएर नाइन्साफीको बाटोमा चल्नेछ ? राजनीतिक मूल्य, सिद्धान्त र सत्यको लडाइँमा अफ्ताब आलमजस्ता नेताहरूले देखाएको दृढता पार्टीका नयाँ पुस्ताका लागि प्रेरणा बन्न सक्नेछ।

देशले सुन्नुपर्ने अन्तिम सन्देश

अफ्ताब आलमको एउटा वाक्य अहिलेको न्याय प्रणाली, राज्य संयन्त्र र राजनीतिका सबै तहका लागि चेतावनी हो, “निर्दोषलाई जेल नपरोस्, जेल नर्क हो।” यो वाक्य केवल व्यक्तिगत अनुभव होइन, यो देशका हजारौं पीडित र अन्याय सहन बाध्य नागरिकहरूको सामूहिक आवाज हो। नेपालले जबसम्म निर्दोषका आँसु पुछ्दैन र न्यायमा विश्वास पुनःस्थापित गर्दैन, तबसम्म प्रजातन्त्रको अर्थ अधुरो रहन्छ । अफ्ताब आलमको पीडा एउटा व्यक्ति वा पार्टीको कथा होइन, यो सत्य, न्याय र मानवीय गरिमाको पुनर्जागरणको आह्वान हो।

अफ्ताब आलमको शवयात्राका केहि तस्विरहरु :