वीरगंज  – लायन्स क्लब वीरगंज परिवारअन्तर्गतका विभिन्न क्लबहरूको संयुक्त आयोजना तथा हरि खेतान बहुमुखी क्याम्पसको व्यवस्थापन सङ्कायको सहयोगमा अन्तर कलेज वक्तृत्वकला प्रतियोगिताको तेस्रो चयन चरण सम्पन्न भएको छ।

“डिजिटल युगमा सामाजिक सञ्जाल : युवा वर्गमा प्रेरणा कि मानसिक तनाव?” विषयमा आयोजित प्रतियोगिताको तेस्रो चरणमा १० कलेजबाट छानिएका ४ महिला र ४ पुरुष प्रतिस्पर्धीले उत्कृष्ट प्रस्तुति दिएका थिए। उक्त चरणबाट कक्षा ११ का छात्र चन्द्रकान्त महतो थारु (पुरुषतर्फ) र कक्षा ११ की छात्रा अदिति महत (महिलातर्फ) विजेता घोषित हुँदै फाइनलका लागि छनोट भएका छन्।

कार्यक्रमको अध्यक्षता लायन्स क्लब वीरगंज मेट्रो सिटीका अध्यक्ष लायन उमेश गुप्ताले गरेका थिए। प्रमुख अतिथि उद्योग वाणिज्य सङ्घका मनोज उपाध्याय रहेका थिए भने डिस्ट्रिक्ट एक्ज्युटिभ चिफ बासु तिमल्सिना, को–चिफ उमेश शर्मा, डिस्ट्रिक्ट चिफ श्याम गुप्ता, गुड्डी जोशी तथा रिजन चेयर पर्सन एवं कार्यक्रम संयोजक सन्दीप गुप्ता कानु विशिष्ट अतिथिका रूपमा सहभागी भएका थिए।

त्यसैगरी लायन्स परिवारका अध्यक्ष नरोत्तम पाण्डे, सेन्ट्रल सिटीकी अध्यक्ष सुशीला साह, कुटुम्बकी अध्यक्ष रचना प्याकुरेल, फ्रेन्डजोनका अध्यक्ष सर्वन साह, एक्सिलेन्सका जोन चेयर पर्सन मनोज उपाध्याय, मेट्रो सिटीका कोषाध्यक्ष अङ्कित चौरसिया, कलेजका चेयरम्यान रवीन्द्र कुमार यादवसहित शिक्षक–विद्यार्थीहरूको उत्साहजनक उपस्थिति रहेको थियो।

आयोजकका अनुसार कार्यक्रम कलेजतर्फबाट रवीन्द्र यादव तथा टोलीको सक्रिय सहयोगमा सुव्यवस्थित रूपमा सम्पन्न गरिएको हो।