काठमाडौँ । तारकेश्वर नगरपालिकाको “एक घर, एक धारा” अभियानलाई प्रभावकारी बनाउँदै शुद्ध खानेपानी सेवा विस्तार गर्ने लक्ष्यसहित आज सिस्नेघारी सिम्लेश्वर खानेपानी मुहान क्षेत्रको स्थलगत निरीक्षण गरिएको छ।

निरीक्षण टोलीमा तारकेश्वर नगरपालिकाका नगर प्रमुख कृष्ण हरि महर्जन, नगर प्रवक्ता तथा वडा नं. २ का वडा अध्यक्ष राधाकृष्ण खड्गी, तारकेश्वर नगर खेलकुद विकास समितिका अध्यक्ष विक्रम खड्गी लगायतको उपस्थिति थियो।

मिति २०४७ सालदेखि सिस्नेघारी सिम्लेश्वर हुँदै पदमसाल क्षेत्रमा खानेपानी वितरण हुँदै आएको छ। यस कार्यमा स्व. हिरा बहादुर खड्गी, स्व. हरिहर ढकाल, स्व. कौडे तामाङ, स्व. धुर्ब अधिकारी लगायत स्थानीय अग्रज व्यक्तिहरूको उल्लेखनीय योगदान रहेको जनाइएको छ। उनीहरूको निरन्तर पहल र सेवाभावले स्थानीयवासीले वर्षौंदेखि निःशुल्क खानेपानी वितरण पाउँदै आएका छन्।

निरीक्षणपछि नगर प्रवक्ता खड्गीले नगरपालिकाले सो मुहानको स्रोत संरक्षण, व्यवस्थापन र समुचित पूर्वाधार विस्तार गरी खानेपानी वितरण प्रणालीलाई अझ व्यवस्थित बनाइने जानकारी दिए। उनका अनुसार, नगरपालिकाको “एक घर, एक धारा” अभियानलाई सिस्नेघारी सिम्लेश्वर परियोजनासँग जोडेर विभिन्न वडामा शुद्ध र सुरक्षित पानी पुर्‍याउने लक्ष्य रहेको छ।

नगर प्रमुख महर्जनले स्थानीय स्रोतको संरक्षण तथा दिगो व्यवस्थापनसहित आधुनिक प्रणालीमार्फत स्वच्छ पानी आपूर्तिमा नगरपालिकाले प्राथमिकता दिएको बताउँदै, सामुदायिक पहल र स्थानीय नेतृत्वसँग सहकार्यमा खानेपानी परियोजना अघि बढाइने उल्लेख गरे।