पर्सा। सशस्त्र प्रहरी बल, नेपालले पर्सा जिल्लाको ठोरी गाउँपालिका–४ मालिबस्तीतर्फ सञ्चालन गरेको नियमित गस्ती तथा चेकजाँच क्रममा महत्त्वपूर्ण सफलता हात पारेको छ। प्रस्तावित सीमा सुरक्षा गुल्म सुवर्णपुरबाट खटिएको प्रहरी टोलीले नेपालबाट भारततर्फ जाँदै गरेको दुई मोटरसाइकललाई शंका लागेपछि रोक गरी चेकजाँच गरेको थियो।

प्र.०२.००१ प ५२०२ र BR 22 AK 2944 नम्बरका मोटरसाइकल थाम्ने क्रममा चालकले घटनास्थलबाट फरार हुने प्रयास गरेपछि प्रहरीले दुवै सवारी साधनलाई नियन्त्रणमा लिएर विस्तृत चेकजाँच अघि बढाएको थियो। चेकजाँचकै क्रममा मोटरसाइकलको ट्याङ्की भित्र विशेष तरिकाले लुकाइ–छिपाइ गरी राखिएको लगभग ९ के.जी. लागुऔषध गाँजा फेला परेको सशस्त्र प्रहरीले जनाएको छ।

बरामद गरिएको गाँजा, मोटरसाइकल तथा एक थान एन्ड्रोइड मोबाईलसहित आवश्यक कानुनी प्रक्रिया अगाडि बढाइ सम्बन्धित निकायमा बुझाउने तयारी भइरहेको सशस्त्र प्रहरीले जानकारी दिएको छ।

सीमावर्ती क्षेत्रमा हुने अवैध गतिविधि नियन्त्रण तथा सुरक्षामा सशस्त्र प्रहरी बलको दक्षता, तत्परता र प्रतिबद्धताको यो उदाहरणले पुनः पुष्टि गरेको छ। स्थानीयवासीहरूले पनि सशस्त्र प्रहरी बलको सक्रियता र प्रभावकारी कारबाहीप्रति प्रशंसा व्यक्त गरेका छन्।