गण्डकी । पोखरा अन्तरराष्ट्रिय विमानस्थलबाट भुटानको पारोका लागि सिधा उडान मङ्गलबारदेखि औपचारिक रूपमा सुरु भएको छ। युनिभर्सल टुर्स एण्ड ट्राभल्स (यूटीटी) र भुटान एयरले सन्चालन गरेको पहिलो उडानले पोखराको अन्तरराष्ट्रिय उडान विस्तारमा महत्वपूर्ण अध्याय थपेको छ।

गत असोज १२ (सेप्टेम्बर २८) देखि चारवटा चार्टर उडान गर्ने भनिए पनि विभिन्न प्राविधिक तथा व्यवस्थापकीय कारणले उडान अघि सारिँदै आएको थियो। अन्ततः मङ्गलबार भएको पहिलो उडानमार्फत पोखरा–पारो सिधा सेवा थालिएको पोखरा महानगरका प्रमुख धनराज आचार्यले जानकारी दिए।

उनी भुटान एयर र यूटीटीको निमन्त्रणामा पहिलो उडानमार्फत थिम्पु पुगेका थिए। पारो विमानस्थलमा सफल अवतरणबारे जानकारी दिँदै प्रमुख आचार्यले भने, “पोखराबाट नौ जना पाहुना तथा क्रु सदस्यसहित आएको विमान सुरक्षित अवतरण गरेको छ। केही प्राविधिक कारणले पूर्व निर्धारित टिम सहभागी हुन नसके पनि नियमित उडान छिट्टै सुरु हुने अपेक्षा राखेका छौँ।”

पूर्वनिर्धारित कार्यक्रम अघिल्लो आन्दोलनका कारण पुन:तालिकीकरण भएको र बाँकी नियमित उडान २०२६ अप्रिलदेखि सुरु हुने जानकारी भुटान एयरलाइन्सले दिएको उनले उल्लेख गरे।

भुटान एयरलाइन्सको १२६ सिट क्षमताको विमानमार्फत चार्टर उडानसहित पाँच दिन, चार रातको ट्राभल प्याकेज पनि सार्वजनिक गरिएको छ। पोखरा–भुटान सिधा उडानले दुवै देशको पर्यटन प्रवर्द्धनमा महत्वपूर्ण प्रभाव पार्ने पोखरा पर्यटन परिषद्का अध्यक्ष तारानाथ पहारी बताउँछन्।

सरकारले विदेशी एयरलाइन्सलाई पोखरा र भैरहवा विमानस्थलमा आकर्षक छुट सुविधा दिएको छ। अन्तरराष्ट्रिय उडानका लागि लाग्ने यात्रु सेवा शुल्क, पार्किङ, ल्यान्डिङ, न्याभिगेसन तथा ग्राउन्ड ह्यान्डलिङ सेवामा उल्लेख्य छुट लागू भएपछि नयाँ उडानकाे सम्भावना थप खुलेको देखिन्छ।

हाल भुटान एयरलाइन्सले काठमाडौँ–भुटान मार्गमा सातामा चार उडान गर्दै आएको छ। पोखराबाट यसअघि सिचुवान एयरलाइन्सले केही चार्टर उडान गरेको थियो भने हिमालयन एयरलाइन्सले ल्हासाका लागि नियमित उडान सञ्चालन गरिरहेको छ।

हिमालय, सिचुवान तथा अब भुटान एयरलाइन्सको उडान विस्तारसँगै पोखरा अन्तरराष्ट्रिय विमानस्थल चलायमान हुने र अन्तरराष्ट्रिय गन्तव्यमा जाने यात्रुको विकल्प बढ्ने अपेक्षा गरिएको छ।

१७ पुस २०७९ मा उद्घाटन भएको राष्ट्रिय गौरवको आयोजना—पोखरा अन्तरराष्ट्रिय विमानस्थल—३,९०० रोपनी क्षेत्रफलमा फैलिएको छ। करिब २२ अर्ब लागतमा बनेको विमानस्थलले वार्षिक आठ लाख यात्रु सेवा दिन सक्ने क्षमता राख्दछ। २,५०० मिटर लम्बाइ र ४५ मिटर चौडाइको धावनमार्गसहित यस विमानस्थलले अब नियमित अन्तरराष्ट्रिय उडानको सम्भावनालाई मूर्तरूप दिन थालेको छ।