काठमाडौ । राष्ट्रिय विभूति पासाङ ल्हामु शेर्पाले सगरमाथा आरोहण गरेको ३० औं उत्सव र उनकै सम्झनामा स्थापना भएको पासाङ ल्हामु निकोल निक्कि अस्पतालको २० औं वर्षमा प्रवेश गरेको अवसरमा भव्य रुपमा वार्षिकोत्वस कार्यक्रम सम्पन्न भएको छ ।

वार्षिकोत्सव कार्यक्रमका प्रमुख अतिथि स्विर राजदूत दानियल भेरोनिक मोलीले हिमालयको मुटुमा रहेको पासाङ ल्हामु निकोल निक्की अस्पताल स्विस–नेपाली एकताको प्रतीक भएको बताइन् ।
समुन्द्री सतहबाट झण्डै २ हजार ९ सय मिटर उचाई लुक्लामा रहेको अस्पतालको २० औं वार्षिकोत्सवमा सामेल हुन पाउँदा आफूँले गौरावान्वित महसुस गरेको उनको जिकिर थियो । नेपालको दुर्गम क्षेत्रमा सुविधा सम्पन्न अस्पताल २० वर्षदेखि नियमित सञ्चालन आउनुलाई उनले उल्लेखनीय उपलब्धि भएको बताइन् ।
कार्यक्रममा विशिष्ठ अतिथि खुम्बु पासाङ ल्हामु गाउँपालिका अध्यक्ष मिङ्मा छिरिङ शेर्पाले यो अस्पतालले स्थानीयबासी र बाह्य पर्यटकहरुको स्वास्थ्य सेवामा महत्वपूर्ण भूमिका खेल्दै आएको जानकारी गराए ।

अध्यक्ष मिङ्माले भने, ‘पासाङ ल्हामु अस्पतालले महिलाको पाठेघरको उपचार, सुत्केरी लगायतका सम्वेदनशिल स्वास्थ्य उपचारदेखि गर्ने गरेको र आर्थिक अवस्था कमजोर हुने स्थानीयबासीलाई निःशुल्क औषधी उपचार गर्दै आएको छ । त्यसैगरी हिमाल चढ्न र स्कर्टिङ खेल्न आउने पर्यटकहरुको रेक्युपछिको उपचारमा समेत अस्पतालले महत्वपूर्ण भूमिका खेलिरहेको छ । यो खुम्बु पासाङ ल्हामु गाउँपालिकाको लागि गर्वको विषय हो ।’

अस्पतालका संस्थापक तथा फाउन्डेसन निकोल निक्कीले यो अस्पतालसँग जोडिएको २० वर्ष वितेको पत्तै नपाएको बताइन् । उनले अस्पताल र फाउन्डेशनमार्फत मानवसेवामा जोडिन सहयोग गरेको भन्दै स्विजरल्याण्डका दाताद्वय रब र राल्फलाई विशेष धन्यवाद व्यक्त गरिन् ।

उनले भनिन्, ‘रब र राल्फ बिशेष सहयोगमा जन्म चिल्ड्रेन एजुकेसन प्रोजेक्ट स्थापना गरियो जुन प्रोजेक्टले गर्दा गर्भवती महिलाहरु यस अस्पतालमा आउन थाले । त्यसैगरी जन्म चिल्ड्रेन एजुकेसन प्रोजेक्ट मार्फत अस्पतालमा जन्मेका बालबालिकालाई १० कक्षा सम्म अध्ययन गर्नको लागि बार्षिक छात्रवृत्ति २२० स्विस फ्रान्क बराबर हुन आउने नेपाली रकम बालबालिकाको बैंक खातामा जम्मा गरिएको छ । यो वर्ष २६१ जना बालबालिकालाई छात्रवृत्ति उपलब्ध गराएका छौं ।’

अस्पतालका कार्यकारी निर्देशक पासाङकाजी शेर्पाले यस पासाङ ल्हामु निकोल निक्की अस्पतालले हिमाली क्षेत्रमा बसोबास गर्ने निम्न आय भएका परिवारको स्वास्थ्य र शिक्षा ग्यारेन्टी गर्दै आएको बताए ।

२० बर्षको अन्तरालमा अस्पतालले करिब ३ लाख बिरामीहरुको सेवा गर्न पाउँदा र दुर्गममा १ हजार ५ सय जना बालबालिकाहरुले सो अस्पतालमा जन्म लिएको कार्यकारी निर्देशक शेर्पाको दाबी छ ।
हिमाली भेगमा स्थापना भएको अस्पताल अत्याधुनिक प्रविधिसहित सेवा सुविधा प्रदान गर्दै आएको बताए । उनले भने, ‘विरामीहरुको लागि गुणस्तरका सामानहरु खरिद गरि अत्याधुनिक प्रविधिसहित सेवा प्रवाह गरिरहेका छौं । त्यसका अलवा अस्पतालले आँखा शिबिर, हाडजोर्नी शिबिर संचालन गर्दै आएका र्छौ ।’

कार्यक्रममा खुम्बु पासाङ ल्हामु गाउँ पालिकाकाका उपमेयर टाशी ल्हामु शेर्पा, पासाङ ल्हामु फाउन्डेसनका अध्यक्ष तथा स्पेनका लागि पूर्वराजदूत दावा फुटी सेर्पा, राष्ट्रिय विभूती पासाङ ल्हामु शेर्पाका भाई साइलो भाई क्याप्टेन आङ गेलु शेर्पा, निकोल निक्की फाउन्डेशनका सदस्य पासाङ ग्याल्जेन शेर्पा लगायतको उपस्थिति रहेको थियो ।

कार्यक्रममा स्थानीय महिला समूहद्वारा कल्चर डान्ससमेत प्रस्तुत गरेका थिए भने स्वीजरल्याण्ड लगायत विदेशी तथा स्वदेशी पाहुनाहरुलाई स्थानीय परिकारको स्वाद चखाइएको थियो । कार्यक्रममा झण्डै ५ सय जना सहभागि रहेका थिए ।