जेनेभा । संयुक्त राज्य अमेरिका र चीन कृत्रिम बुद्धिमत्ता (एआई) प्रविधिको विकासमा विश्वका दुई प्रमुख प्रतिस्पर्धी राष्ट्रका रूपमा उभिएका छन् । सन् २०१४ देखि २०२३ सम्मको अवधिमा चीनले एआई सम्बन्धी सबैभन्दा धेरै आविष्कार दर्ता गरेको एक अन्तर्राष्ट्रिय प्रतिवेदनले जनाएको छ ।

अन्तर्राष्ट्रिय व्यवस्थापन विकास संस्थान (IMD) ले सार्वजनिक गरेको दोस्रो कृत्रिम बुद्धिमत्ता प्रगति सूचकांक अनुसार, प्रविधि क्षेत्रमा अमेरिकी कम्पनीहरू नवप्रवर्तनमा अग्रस्थानमा रहेका छन् भने चीनका कम्पनीहरू दोस्रो स्थानमा छन् ।

IMD का रणनीति तथा डिजिटल अध्ययनका प्राध्यापक माइकल वेडका अनुसार चीनले कृत्रिम बुद्धिमत्ताको प्रयोग उद्योग, स्वास्थ्य उपचार, बीमा, र स्वचालित सवारी साधनजस्ता व्यावहारिक क्षेत्रमा तीव्र गतिमा विस्तार गरिरहेको छ । उनले भने, “उन्नत कम्प्युटर चिप्स प्राप्त गर्न कठिनाइ भए पनि चीनले सन् २०१४ देखि २०२३ सम्म ३८ हजारभन्दा बढी एआई सम्बन्धी आविष्कार दर्ता गरेको छ, जुन सङ्ख्या अमेरिकाभन्दा निकै बढी हो ।”

उनका अनुसार, चीनले अत्यन्त शक्तिशाली एआई प्रणाली निर्माणभन्दा बढी त्यसलाई जनजीवनमा सहज र व्यवहारिक रूपमा प्रयोग गर्न केन्द्रित गरेको छ ।

प्रतिवेदनका अनुसार, प्रविधि र सञ्चार क्षेत्रमा विश्वका ठूला कम्पनीहरूले कृत्रिम बुद्धिमत्तामा ठूलो लगानी गरिरहेका छन् । चीनमा प्रविधि र बीमा क्षेत्रका कम्पनीहरू सबैभन्दा सक्षम देखिएका छन् भने ऊर्जा र निर्माणजस्ता परम्परागत सरकारी उद्योगहरू अझै पछि परेका छन् ।

उक्त प्रतिवेदनले एआई प्रविधि प्रभावकारी रूपमा प्रयोग गर्ने कम्पनीहरूको औसत वार्षिक आम्दानी ६.७९ प्रतिशतले बढेको उल्लेख गरेको छ । विपरीत, एआई उपयोगमा कमजोर कम्पनीहरूको आम्दानी ०.५१ प्रतिशतले घटेको छ ।

स्विट्जरल्यान्डस्थित अन्तर्राष्ट्रिय व्यवस्थापन विकास संस्थानले लोजान र सिङ्गापुरमा शिक्षण केन्द्र सञ्चालन गर्दै आएको छ । हालै उक्त संस्थानले चीनको शेन्जेन शहरमा पनि आफ्नो कार्यदल स्थापना गरेको छ, जसले एआई सम्बन्धी अनुसन्धान र व्यावसायिक उपयोगका क्षेत्रमा सहयोग गर्नेछ ।