काठमाडौं । नेपाल राष्ट्र बैंकले उपदान तथा पेन्सन कोषमा रहेको कुल रु ३ अर्ब ५३ करोड बराबरको रकम बैंक तथा वित्तीय संस्थामार्फत लगानी गर्ने भएको छ। केन्द्रीय बैंकले एक सूचनामार्फत इच्छुक वाणिज्य बैंक, विकास बैंक तथा वित्त कम्पनीलाई मङ्गलबार साँझ ७:०० बजेभित्र आवेदन दिन आग्रह गरेको हो।

राष्ट्र बैंकका अनुसार एक वर्ष अवधिका लागि सो रकम लगानी गर्न लागिएको हो। सूचनामा वाणिज्य बैंकका लागि रु २ अर्ब ८२ करोड ४० लाख, विकास बैंकका लागि रु ५२ करोड ९५ लाख र वित्त कम्पनीका लागि रु १७ करोड ६५ लाख विनियोजन गरिएको उल्लेख छ।

लगानीका लागि आवेदन दिने बैंक तथा वित्तीय संस्थाले निम्न सर्त पूरा गर्नुपर्नेछ—

• कम्तीमा दुई वर्षदेखि सञ्चालनमा रहेको हुनु पर्ने

• न्यूनतम कूल पुँजीकोष कायम भएको हुनुपर्ने

• कूल कर्जा सापटी अनुपात ८ प्रतिशत ननाघेको

• निष्क्रिय कर्जा (NPL) अनुपात ३ प्रतिशत भित्र रहेको

उक्त कोषको सुरक्षित र लाभदायक सञ्चालन तथा वित्तीय प्रणालीमा तरलता व्यवस्थापनलाई सहज बनाउन राष्ट्र बैंकले वार्षिक रूपमा यस्ता लगानी गर्ने गरेको छ।