काठमाडौँ। कृषि विकास बैंक लिमिटेडले साउथ एशियन फेडेरेशन अफ एकाउन्टेन्ट्स (SAFA) द्वारा प्रदान गरिने तीन प्रतिष्ठित अवार्ड प्राप्त गरेको छ। पाकिस्तानको इस्लामाबादमा नोभेम्बर २७, २०२५ मा आयोजित पुरस्कार समारोहमा बैंकले ‘उत्कृष्ट प्रस्तुत वार्षिक प्रतिवेदन पुरस्कार’ (Best Presented Annual Report Award), ‘एकीकृत प्रतिवेदन पुरस्कार’ (Integrated Reporting Award) तथा ‘कर्पोरेट गभर्नेन्सका लागि सार्क वार्षिकोत्सव पुरस्कार २०२४’ (SAARC Anniversary Award for Corporate Governance Disclosure 2024) प्राप्त गर्दै “सार्वजनिक क्षेत्रको बैंक” श्रेणीमा उत्कृष्टता सिद्ध गरेको हो।

उक्त अवार्ड कृषि विकास बैंकका प्रमुख कार्यकारी अधिकृत गोविन्द गुरुङले ग्रहण गर्नुभएको बैंक स्रोतले जनाएको छ।

तीन अवार्ड प्राप्त गर्दै बैंकले पारदर्शिता, सुशासन, उत्तरदायित्व र पेशागत उत्कृष्टताप्रतिको आफ्नो प्रतिबद्धतालाई पुनः पुष्टि गरेको छ। बैंकका अनुसार यो उपलब्धिले वित्तीय प्रतिवेदन, सेवा प्रवाह तथा संस्थागत सुशासनका क्षेत्रमा अझ उच्च मानक कायम राख्दै सेवा गुणस्तरलाई सुदृढ बनाउने प्रेरणा प्रदान गरेको छ।

कृषि विकास बैंकले आगामी दिनमा पनि पारदर्शी, विश्वासयोग्य तथा सरोकारवालामैत्री वित्तीय जानकारी उपलब्ध गराउने तथा सुशासन अभ्यासलाई अविचलित रूपमा निरन्तरता दिने प्रतिबद्धता व्यक्त गरेको छ।