काठमाडौँ। बीवाईडी सिगल (ग्रेट सिगल) को व्यापक परिमार्जन गरिएको दोस्रो पुस्ता चीनमा सार्वजनिक गरिएको छ। नयाँ पुस्ताको विद्युतीय ह्याचब्याकमा ड्राइभट्रेन, चेसिस, सस्पेन्शन तथा इन्टेरियरमा उल्लेख्य परिवर्तन गरिएको छ।

नयाँ सिगलमा मोटरलाई अगाडिको सट्टा पछाडिको एक्सलमा सारिएको छ। यससँगै गाडी फ्रन्ट–ह्विल ड्राइभबाट रियर–ह्विल ड्राइभमा परिणत भएको छ। मोटर पछाडि सारिएपछि अगाडिको भागमा सामान राख्न मिल्ने फ्रन्ट ट्रंक (फ्रंक) का लागि समेत ठाउँ बनेको छ।

चिनियाँ सञ्चारमाध्यम अटोहोमले सार्वजनिक गरेको विवरण चीनको उद्योग तथा सूचना प्रविधि मन्त्रालय (एमआईआईटी) मा दर्ता भएका तथ्यांक तथा यसअघि बाहिर आएका डिजाइन स्केचमा आधारित छ। नयाँ मोडलका तस्बिर तथा विवरणले यसको परिमार्जित चेसिस, ड्राइभट्रेन र भित्री संरचनाबारे थप जानकारी दिएको छ।

यसअघि सार्वजनिक क्याबिन स्केचमा पाँच सिट क्षमताको नयाँ सिगलमा परम्परागत इन्स्ट्रुमेन्ट क्लस्टर हटाइएको संकेत गरिएको थियो। पछिल्ला तस्बिरमा भने नयाँ डिजाइनको ड्यासबोर्ड, फ्लोटिङ सेन्ट्रल टचस्क्रिन तथा अन्य नयाँ उपकरण देखिएका छन्।

रियर–ह्विल ड्राइभमा ९५ किलोवाट मोटर

पहिलो पुस्ताको सिगलमा अगाडि ५५ किलोवाटको मोटर प्रयोग गरिएको थियो। नयाँ पुस्तामा भने मोटरलाई पछाडिको एक्सलमा सारिएको छ।

एमआईआईटीमा दर्ता भएको विवरणअनुसार नयाँ सिगलमा TZ164XYB मोटर प्रयोग गरिएको छ, जसलाई झेङझाउ बीवाईडी अटो कम्पनी लिमिटेडले उत्पादन गरेको हो। उक्त मोटरले ९५ किलोवाट अर्थात् करिब १२७ हर्सपावर शक्ति उत्पादन गर्छ।

पावर बढेसँगै नयाँ सिगलको अधिकतम गति पनि १५० किलोमिटर प्रतिघण्टासम्म पुगेको छ।

चेसिसमा समेत उल्लेख्य परिवर्तन गरिएको छ। पहिलो पुस्तामा प्रयोग गरिएको पछाडिको टर्सन–बीम सस्पेन्शनको स्थानमा नयाँ मोडलमा इन्डिपेन्डेन्ट मल्टि–लिंक रियर सस्पेन्शन राखिएको छ।

नयाँ सिगलमा १६ इन्चका डुअल फोर–स्पोक एलोय ह्विलसँग २०५/६० आर१६ आकारका टायर प्रयोग गरिएको छ।

फ्रन्ट ट्रंक र नयाँ इन्टेरियर

मोटर पछाडिको भागमा सारिएपछि अगाडिको भागमा अतिरिक्त स्टोरेज स्पेस उपलब्ध भएको छ। नयाँ सिगलमा फ्रन्ट ट्रंक अर्थात् फ्रंक समावेश गरिएको छ। यद्यपि, यसको क्षमता कति लिटर हुने भन्ने विवरण बीवाईडीले अहिलेसम्म सार्वजनिक गरेको छैन।

क्याबिनमा फ्ल्याट–बटम डिजाइनको दुई–स्पोक मल्टिफङ्सन स्टेयरिङ ह्विल र फ्लोटिङ सेन्ट्रल टचस्क्रिन राखिएको छ। नयाँ डिजाइनको सेन्टर कन्सोलमा एयर भेन्ट्समुनि फिजिकल टगल स्विच, वायरलेस फोन चार्जर तथा ठाडो रूपमा राखिएका दुई कप होल्डर छन्।

बाहिरी डिजाइनमा पनि केही परिवर्तन गरिएको छ। परम्परागत बाहिर निस्कने डोर ह्यान्डलको सट्टा सेमी–हिडन मेकानिकल डोर ह्यान्डल प्रयोग गरिएको छ। पछाडिको भागमा ठूलो रूफ स्पोइलर, स्पिल टेललाइट र एकीकृत तल्लो डिफ्युजर देखिन्छ।

इन्जिनियरिङ टेस्ट म्युलमा देखिएको वैकल्पिक रूफ–माउन्टेड लिडार पोडले बीवाईडीको डिपाइलट ३०० अर्थात् ‘गड्स आई बी’ लेभल–२ ड्राइभिङ असिस्टेन्स प्रणालीलाई सहयोग गर्ने बताइएको छ।

दोस्रो पुस्ताको ब्लेड ब्याट्री र फास्ट चार्जिङको सम्भावना

हालै सार्वजनिक प्रचारात्मक तस्बिरमा उच्च भेरियन्टमा बीवाईडीको दोस्रो पुस्ताको ब्लेड ब्याट्री तथा फ्ल्यास चार्जिङ प्रविधि प्रयोग हुन सक्ने संकेत देखिएको छ।

यद्यपि, बीवाईडीले नयाँ सिगलको चार्जिङ क्षमता, चार्ज हुन लाग्ने समय वा ब्याट्रीको आधिकारिक स्पेसिफिकेसन भने सार्वजनिक गरिसकेको छैन। त्यसैले यी विवरणलाई हालसम्म अनुमानका रूपमा मात्र लिन सकिन्छ।

जिली ईएक्स२सँग बढ्दो प्रतिस्पर्धा

नयाँ डिजाइनका कारण बीवाईडी सिगल र जिली ईएक्स२ बीच प्राविधिक समानता पनि देखिएको छ। चीनमा ‘सिङयुआन’ नामबाट बिक्री हुने जिली ईएक्स२ र नयाँ सिगल दुवैमा रियर–ह्विल ड्राइभ, इन्डिपेन्डेन्ट रियर सस्पेन्शन र फ्रन्ट ट्रंक उपलब्ध छन्।

दुवै गाडीको ह्वीलबेस २,६५० मिलिमिटर रहेको छ। नयाँ सिगलको लम्बाइ भने ४,२०५ मिलिमिटर छ, जुन जिली ईएक्स२ भन्दा करिब ७० मिलिमिटर लामो हो।

चीनको सानो विद्युतीय सवारीसाधन बजारमा प्रतिस्पर्धा तीव्र भइरहेका बेला बीवाईडीले सिगलमा यस्ता महत्वपूर्ण प्राविधिक परिवर्तन गरेको हो।

चीन इभी डाटाट्र्याकरका अनुसार गत अगस्टमा पुरानो सिगलको घरेलु खुद्रा दर्ता १०,१०३ युनिट थियो। सोही अवधिमा जिली सिङयुआनको खुद्रा दर्ता ३९,६५१ युनिट र होलसेल डेलिभरी ६०,९५५ युनिट रहेको थियो।

नयाँ बीवाईडी सिगलको आधिकारिक मूल्य तथा बजारमा बिक्री सुरु हुने मिति भने कम्पनीले हालसम्म घोषणा गरेको छैन।