काठमाडौं । स्वच्छ ऊर्जा उत्पादन र त्यसको प्रभावकारी उपयोगलाई प्रवर्द्धन गर्ने उद्देश्यका साथ दूरसञ्चार तथा डिजिटल प्रविधि क्षेत्रको अग्रणी कम्पनी ह्वावेले नेपालमा आफ्ना दुई अत्याधुनिक ऊर्जा समाधान सार्वजनिक गरेको छ।

काठमाडौंमा आयोजित विशेष समारोहमा कम्पनीले सौर्य ऊर्जा उत्पादनलाई अझ स्मार्ट र प्रभावकारी बनाउने ‘फ्युजनसोलार ९.० (FusionSolar 9.0)’ तथा विद्युत् भण्डारण र ग्रिड व्यवस्थापनलाई सुदृढ बनाउने ‘लुटेरा युटिलिटी ग्रिड फर्मिङ (LUNA Utility Grid Forming)’ प्रविधिको औपचारिक शुभारम्भ गरेको हो।

नेपाल उद्योग परिसंघ (सीएनआई) का अध्यक्ष वीरेन्द्रराज पाण्डे तथा ह्वावेका उच्च अधिकारीहरूले संयुक्त रूपमा नयाँ प्रविधिको उद्घाटन गरेका थिए। नेपालले नवीकरणीय ऊर्जाको विकासमा तीव्र गति लिइरहेको अवस्थामा सार्वजनिक गरिएका यी समाधानले राष्ट्रिय विद्युत् ग्रिडको स्थायित्व र विश्वसनीयता अभिवृद्धि गर्न महत्वपूर्ण योगदान पुर्‍याउने विश्वास व्यक्त गरिएको छ।

जलविद्युत् र सौर्य ऊर्जाको उच्च सम्भावना रहेको नेपालमा उत्पादन र मागबीच सन्तुलन कायम गर्न आधुनिक ऊर्जा भण्डारण प्रणाली अत्यावश्यक बन्दै गएको विश्लेषकहरूको भनाइ छ। यस सन्दर्भमा ह्वावेका नयाँ समाधानहरू उपयोगी हुने अपेक्षा गरिएको छ।

कम्पनीका अनुसार फ्युजनसोलार ९.० ले डिजिटल तथा कृत्रिम बुद्धिमत्ता (एआई) आधारित व्यवस्थापनमार्फत ठूला सौर्य परियोजनाको उत्पादन क्षमता वृद्धि गर्न सहयोग पुर्‍याउनेछ। त्यस्तै लुटेरा युटिलिटी ग्रिड फर्मिङ प्रविधि अत्याधुनिक ब्याट्री ऊर्जा भण्डारण प्रणाली (BESS) मा आधारित रहेको छ, जसले नवीकरणीय स्रोतबाट उत्पादित विद्युत् सञ्चित गरी ग्रिडको स्थिरता कायम राख्न र विद्युत् आपूर्तिलाई थप भरपर्दो बनाउन मद्दत गर्नेछ।

यी दुवै प्रविधिको संयुक्त प्रयोगबाट नेपालमा सुरक्षित, दिगो र आधुनिक ऊर्जा पूर्वाधार निर्माणमा निजी तथा सरकारी क्षेत्रलाई सहयोग पुग्ने विश्वास गरिएको छ।

कार्यक्रमलाई सम्बोधन गर्दै ह्वावे नेपालका प्रमुख कार्यकारी अधिकृत (सीईओ) चेस्टर चेन ले ह्वावेले विगत २६ वर्षदेखि नेपालको सूचना तथा सञ्चार प्रविधि क्षेत्रमा निरन्तर योगदान दिँदै आएको स्मरण गराए। नेपालको डिजिटल रूपान्तरण र स्वच्छ ऊर्जा यात्रामा सहकार्य गर्न पाउँदा गौरव महसुस भएको उल्लेख गर्दै उनले आगामी दिनमा पनि अत्याधुनिक प्रविधिमार्फत नेपालको दिगो विकासमा साथ दिने प्रतिबद्धता व्यक्त गरे।

कार्यक्रममा ऊर्जा क्षेत्रका विकासकर्ता, उद्योगी, सरकारी अधिकारी तथा सरोकारवालाको उल्लेखनीय सहभागिता रहेको थियो। सहभागीहरूले नेपालले कार्बन उत्सर्जन न्यूनीकरण र हरित ऊर्जा लक्ष्य हासिल गर्न डिजिटल ऊर्जा प्रविधिको भूमिका महत्वपूर्ण रहने धारणा व्यक्त गरेका थिए।

सन् १९९९ देखि नेपालमा दूरसञ्चार, सूचना प्रविधि तथा डिजिटल पूर्वाधार विकासमा सक्रिय ह्वावेले पछिल्ला वर्षहरूमा हरित ऊर्जा तथा स्मार्ट ऊर्जा समाधानलाई पनि आफ्नो प्रमुख प्राथमिकताका रूपमा अघि बढाउँदै आएको जनाएको छ।