काठमाडौँ : नेपाली कांग्रेसका नेता डा. शेखर कोइरालाले आगामी चुनावमा नेपाली कांग्रेस संसदको पहिलो पार्टी बन्ने दाबी गरेका छन् । मंगलबार सम्पर्क कार्यालयमा पत्रकारहरूसँगको भेटघाटमा कोइरालाले सामाजिक सञ्जालमा नयाँ पार्टीहरूको प्रचार बढी देखिए पनि कांग्रेसले जनमत नगुमाएको बताए । उनका अनुसार चुनाव कांग्रेसका लागि आफ्नो सामर्थ्य परीक्षण गर्ने समय हो । त्यसैले आन्तरिक विवादलाई थन्क्याएर सबैले चुनावी परिणाममा केन्द्रित हुनुपर्ने उनले बताए ।

डा. कोइरालाले भने, ‘कांग्रेस अबको चुनावबाट पनि संसद्को पहिलो पार्टी बन्छ । सामाजिक सञ्जालमा प्रचार फरक ढङ्गले भए पनि कांग्रेसले जनमत गुमाएको छैन’। उनले थपे, ‘सबै निर्वाचन क्षेत्रमा उम्मेदवार भएकाले समानुपातिक मत बढ्नेछ । सबै पार्टी एक्ला एक्लै लडेकाले प्रत्यक्षतर्फको सिट पनि बढ्छ, घट्दैन ।’

पार्टीभित्र मतभेद हुनु स्वाभाविक भएको उल्लेख गर्दै कोइरालाले ती विषय आन्तरिक रूपमै समाधान हुने बताए । चुनावी नतिजाले पार्टीलाई घाटा पुग्ने काम कसैले पनि नगर्ने विश्वास उनले व्यक्त गरे। हरेक निर्वाचन क्षेत्रमा राम्रो तयारी गर्न सके देशभरको परिणाम सकारात्मक आउने उनको भनाइ छ।