काठमाडौँ । ब्रिटिस हेरिटेज तथा जेएसडब्लू एमजी मोटरले आफ्नो बहुप्रतीक्षित फ्ल्यागसिप विलासी एसयूभी ‘एमजी म्याजेस्टर’ को पहिलो झलक सार्वजनिक गर्दै भारतीय बजारमा आधिकारिक बुकिङ खुला गरेको छ। कम्पनीले हाल बिक्रीमा रहेको एमजी ग्लोस्टरलाई प्रतिस्थापन गर्ने तयारीस्वरूप नयाँ तीन-रो प्रिमियम एसयूभी बजारमा ल्याएको हो।

कम्पनीका अनुसार एमजी म्याजेस्टरको औपचारिक बिक्री तथा डेलिभरी आगामी केही साताभित्र सुरु हुनेछ। भारतीय बजारका लागि यसको सबैभन्दा उच्च सुविधायुक्त ‘स्याभी’ भेरियन्टको मूल्य ४० लाख ९९ हजारदेखि ४४ लाख ९९ हजार भारतीय रुपैयाँसम्म निर्धारण गरिएको छ। सुरुवाती भेरियन्टको मूल्य तथा विस्तृत उत्पादन विवरण भने लन्चिङका क्रममा सार्वजनिक गरिने कम्पनीले जनाएको छ।

नयाँ म्याजेस्टरलाई आकर्षक र आधुनिक डिजाइनमा तयार गरिएको छ। अगाडिको भागमा ठूलो ग्लोसी ब्ल्याक ग्रिल, म्याट्रिक्स एलईडी हेडल्याम्प तथा बलियो बडी डिजाइनले यसलाई प्रिमियम तथा दमदार उपस्थितिसहित प्रस्तुत गरेको छ। करिब ५ हजार ४६ मिलिमिटर लम्बाइ भएको यो एसयूभी आफ्नो सेगमेन्टकै सबैभन्दा लामो र फराकिलो मोडलमध्ये एक मानिएको छ।

गाडीमा १९ इन्चका ड्युअल-टोन अलोय ह्विल, आधुनिक कनेक्टेड एलईडी टेलल्याम्प तथा आकर्षक साइड प्रोफाइल समावेश गरिएको छ। इन्टेरियरमा अल-ब्ल्याक र ग्रे कलर थिमसँगै प्रिमियम लेदर सिट प्रयोग गरिएको छ। यो गाडी ६ सिट र ७ सिट दुवै विकल्पमा उपलब्ध हुनेछ।

फिचरका हिसाबले म्याजेस्टर अत्याधुनिक प्रविधिले भरिपूर्ण छ। यसमा १२.३ इन्चको इन्फोटेनमेन्ट टचस्क्रिन, १२.३ इन्चको पूर्ण डिजिटल ड्राइभर डिस्प्ले, वायरलेस एन्ड्रोइड अटो तथा एप्पल कारप्ले, प्यानोरामिक सनरुफ, ६४-कलर एम्बियन्ट लाइटिङ, डुअल वायरलेस चार्जर तथा एयर प्युरिफिकेसन सिस्टम जस्ता सुविधा उपलब्ध छन्।

आरामदायी यात्राका लागि अगाडि तथा पछाडिका सिटमा मसाजिङ र भेन्टिलेटेड फिचर दिइएको छ भने मनोरञ्जनका लागि १२ स्पिकरयुक्त प्रिमियम जेबीएल अडियो सिस्टम जडान गरिएको छ।

इन्जिनतर्फ म्याजेस्टरमा २.० लिटर क्षमताको ट्विन-टर्बो डिजेल इन्जिन प्रयोग गरिएको छ, जसले २१५ हर्सपावर र ४७९ एनएम टर्क उत्पादन गर्छ। यो इन्जिन ८-स्पीड अटोमेटिक गियरबक्ससँग जोडिएको छ। कम्पनीका अनुसार आफ्नो सेगमेन्टमा ट्विन-टर्बो डिजेल इन्जिन प्रदान गर्ने यो एकमात्र एसयूभी हो।

गाडी २-ह्विल ड्राइभ र ४-ह्विल ड्राइभ दुवै विकल्पमा उपलब्ध हुनेछ। ४-ह्विल ड्राइभ संस्करणमा १० वटा फरक अफ-रोड मोड, डिफरेन्सियल लक तथा क्रोल मोड जस्ता प्रविधि समावेश गरिएको छ, जसले कठिन तथा चुनौतीपूर्ण सडकमा उत्कृष्ट प्रदर्शन दिने अपेक्षा गरिएको छ।

सुरक्षाका दृष्टिले पनि म्याजेस्टरलाई उच्च प्राथमिकता दिइएको छ। यसमा लेभल–२ एडास (ADAS) प्रणाली, एडाप्टिभ क्रुज कन्ट्रोल, लेन किप असिस्ट, अटोमेटिक इमर्जेन्सी ब्रेकिङ, ७ एयरब्याग, ३६० डिग्री क्यामेरा, इलेक्ट्रोनिक स्ट्याबिलिटी कन्ट्रोल, टायर प्रेसर मोनिटरिङ सिस्टम तथा हिल होल्ड असिस्ट लगायतका आधुनिक सुरक्षा सुविधा समावेश छन्।

बजारमा प्रवेश गरेपछि एमजी म्याजेस्टरले टोयोटा फर्चुनर, जिप मेरिडियन, स्कोडा कोडियाक र फक्सवागन टायरोन जस्ता स्थापित एसयूभीहरूसँग प्रत्यक्ष प्रतिस्पर्धा गर्ने अपेक्षा गरिएको छ। कम्पनीले म्याजेस्टरले आफ्नो वर्गमा विलासिता, प्रविधि र मूल्यबीच उत्कृष्ट सन्तुलन कायम गर्ने विश्वास व्यक्त गरेको छ।

भारतीय बजारमा बुकिङ खुला भएसँगै नेपाली अटो पारखीहरूबीच पनि यस नयाँ प्रिमियम एसयूभीप्रति उत्सुकता बढ्दै गएको छ।