वीरगञ्ज। पर्सा जिल्लाको राजनीतिक माहोलमा यसपटक फरक खालको बहस सुरु भएको छ। लामो समयदेखि दोहोरिँदै आएका अनुहार र पुरानै शैलीको राजनीतिबाट दिक्क बनेका मतदातामाझ उज्यालो नेपाल पार्टीले शिक्षित, पेशागत रूपमा सक्षम र प्रत्यक्ष जनसेवाबाट खारिएका युवाहरूलाई उम्मेदवार बनाएपछि नयाँ आशा र चासो पैदा भएको छ।

कुलमान घिसिङको नेतृत्वमा रहेको उज्यालो नेपाल पार्टीले पर्साका चारवटै प्रतिनिधिसभा निर्वाचन क्षेत्रमा एकसाथ उम्मेदवारी दर्ता गराउँदै ‘राजनीति सेवा हो, पद होइन’ भन्ने सन्देश दिन खोजेको देखिन्छ। पार्टीका नेताहरूका अनुसार यो निर्णय केवल चुनाव जित्नका लागि होइन, दीर्घकालीन राजनीतिक संस्कार परिवर्तन गर्ने उद्देश्यसहित गरिएको हो।

पर्सा क्षेत्र नं. १ बाट ३५ वर्षीय रामकिशोर सिंह (पराग), क्षेत्र नं. २ बाट चार्टर्ड एकाउन्टेन्ट कृष्णमुरारी प्रजापति, क्षेत्र नं. ३ बाट शिक्षक रामरुप साह कानु र क्षेत्र नं. ४ बाट शिक्षक विनोद यादवलाई उम्मेदवार बनाइएको छ। यी सबै उम्मेदवार राजनीति बाहिरका पेशा, समाजसेवा र प्रत्यक्ष अनुभवबाट आएका व्यक्तिहरू हुन्, जसले पार्टीको उम्मेदवार चयनलाई अरूभन्दा फरक बनाएको छ।

विशेषगरी पर्सा क्षेत्र नं. १ का उम्मेदवार रामकिशोर सिंह (पराग) को उम्मेदवारीलाई राजनीतिक वृत्तमा अर्थपूर्ण रूपमा हेरिएको छ। उहाँ वीरगञ्ज महानगरपालिका वडा नं. २० का निर्वाचित वडाध्यक्ष हुनुहुन्थ्यो। स्थानीय तहमा स्थिर हैसियत, सुविधा र प्रभाव हुँदाहुँदै पनि राष्ट्रिय तहबाट देश र युवाको पक्षमा काम गर्न सकिन्छ भन्ने विश्वासका साथ उहाँले वडाध्यक्ष पदबाट राजीनामा दिएर प्रतिनिधिसभा निर्वाचनमा उम्मेदवारी दिनुभएको हो।

स्थानीय तहमा रहँदा सिंहले आधारभूत सेवा, युवासँग प्रत्यक्ष संवाद, सामाजिक समस्या समाधान र पारदर्शी कार्यशैलीमार्फत छुट्टै पहिचान बनाउनुभएको थियो। त्यही अनुभवलाई राष्ट्रिय स्तरमा लैजान सकिन्छ भन्ने विश्वासका कारण उहाँको उम्मेदवारीलाई ‘त्यागबाट जन्मिएको नेतृत्व’ का रूपमा हेरिएको छ।

रामकिशोर सिंह (पराग) ले युवाहरूको रोजगारी, सीप विकास, स्थानीय उद्योग प्रवर्द्धन, वैदेशिक रोजगारीको विकल्प सिर्जना तथा भ्रष्टाचाररहित प्रशासनलाई आफ्नो मुख्य एजेन्डा बनाउँदै चुनावी मैदानमा उत्रिनुभएको छ। उहाँका अनुसार पर्सा र वीरगञ्ज क्षेत्र आर्थिक सम्भावनाले भरिपूर्ण हुँदाहुँदै पनि नीति र इच्छाशक्तिको अभावले पछि परेको छ।

“युवालाई विदेश पठाउने बाध्यता अन्त्य गर्न यहीँ रोजगारी सिर्जना गर्नुपर्छ,” सिंह भन्नुहुन्छ, “राजनीति भाषण र नारामा सीमित हुँदा देशले दिशा पाउँदैन, त्यसैले अब परिणाम देखिने काम आवश्यक छ।”

पर्सा क्षेत्र नं. २ का उम्मेदवार कृष्णमुरारी प्रजापति आर्थिक क्षेत्रको गहिरो ज्ञान भएका व्यक्ति हुनुहुन्छ। चार्टर्ड एकाउन्टेन्टको हैसियतमा उहाँले राज्यको खर्च प्रणाली, कर संरचना र आर्थिक अनुशासन सुधार्ने विषयलाई प्राथमिकतामा राख्नुभएको छ।

यसैगरी शिक्षक पेशाबाट आएका रामरुप साह कानु र विनोद यादवले शिक्षा, सामाजिक चेतना र नैतिक मूल्यलाई राजनीतिको केन्द्रमा ल्याउने प्रतिबद्धता जनाएका छन्। शिक्षाबाट समाज बदल्न सकिन्छ भन्ने विश्वास बोकेका यी उम्मेदवारहरूले संसद्लाई नीतिगत बहसको थलो बनाउने लक्ष्य लिएका छन्।

उज्यालो नेपाल पार्टीले पर्सामा प्रस्तुत गरेको यो मोडेललाई परम्परागत दलहरूबाट फरक प्रयासका रूपमा हेरिएको छ। पार्टीका अनुसार चुनाव जित्नु मात्र लक्ष्य नभई राजनीतिमा नयाँ मानक स्थापित गर्नु यसको मुख्य उद्देश्य हो।

पर्सामा देखिएको यो नयाँ राजनीतिक अभ्यासले मतदातामाझ ‘यसपटक केही फरक हुन्छ कि?’ भन्ने प्रश्नसँगै आशा पनि जन्माएको छ। विशेषगरी रामकिशोर सिंह (पराग) जस्ता स्थानीय तहबाट खारिएका, त्याग र प्रतिबद्धतासहित अघि बढेका युवा नेताको उपस्थितिले पर्सा–१ को चुनावलाई थप अर्थपूर्ण बनाएको छ।