काठमाडौं । टाटा मोटर्स अन्तर्गतको विद्युतीय सवारी ब्रान्ड टाटा डट ईभीले नयाँ ‘कर्भ डट ईभी सिरिज एक्स’ बजारमा सार्वजनिक गरेको छ। यस सिरिज अन्तर्गत ‘एकाम्प्लिस्ड एक्स ५५’ र ‘इम्पावर्ड एक्स ५५’ नामक दुई प्रिमियम भेरिएन्ट सार्वजनिक गरिएका हुन्।

लामो दुरी सहज रूपमा तय गर्न सक्ने लक्ष्यसहित डिजाइन गरिएका यी गाडीहरू ‘एसयूभी कुप’ शैलीमा तयार पारिएका छन्। ५५ किलोवाट आवर क्षमताको ब्याट्री प्याकसहित आउने यस गाडीले १६७ हर्स पावर र २१५ न्युटन मिटर टर्क उत्पादन गर्ने कम्पनीले जनाएको छ।

एआरएआई प्रमाणित ५०२ किलोमिटर रेन्ज तथा वास्तविक सडकमा करिब ४०० किलोमिटर यात्रा गर्न सक्ने क्षमता रहेको यो गाडी अन्तर–सहर यात्राका लागि उपयुक्त मानिएको छ। साथै, कम्पनीले पहिलो खरिदकर्तालाई १५ वर्षको ‘लाइफटाइम’ हाइ–भोल्टेज ब्याट्री वारेन्टी पनि उपलब्ध गराएको छ।

प्रविधि र सुविधामा जोड दिइएको यस सिरिजमा प्यानोरामिक सनरुफ, २६.०३ सेन्टिमिटरको डिजिटल इन्स्ट्रुमेन्ट क्लस्टर र टचस्क्रिन इन्फोटेनमेन्ट सिस्टम समावेश गरिएको छ। साथै, वायरलेस एन्ड्रोइड अटो, एप्पल कारप्ले र ३६० डिग्री सराउन्ड भ्यू क्यामेरा जस्ता आधुनिक सुविधा पनि रहेका छन्।

आरामदायी यात्राका लागि भेन्टिलेसनसहितको ‘आर–कम्फर्ट’ सिट, प्रिमियम लेदरेट अपहोल्स्ट्री र पछाडिका यात्रुका लागि ‘सेरेनिटी स्क्रिन’ सनसेड्सको व्यवस्था गरिएको छ।

यस सिरिजको उच्चस्तरीय ‘इम्पावर्ड एक्स ५५’ भेरिएन्टमा थप प्रिमियम सुविधाहरू समावेश छन्। यसमा ३१.२४ सेन्टिमिटरको सिनेमाटिक टचस्क्रिन, जेबीएलको ९ स्पिकरयुक्त साउन्ड सिस्टम, ६ तरिकाले मिलाउन मिल्ने ड्राइभर सिट तथा लेभल २ एडाससहित २० वटा सुरक्षा सुविधा रहेका छन्।

थप रूपमा १८ इन्च एलोय ह्वील, भीटूभी र भीटूएल चार्जिङ, इसाराले खुल्ने टेलगेट र स्मार्ट लाइटिङ एनिमेशन जस्ता आकर्षक विशेषता पनि समावेश गरिएका छन्।

मूल्यका हिसाबले ‘एकाम्प्लिस्ड एक्स ५५’ को मूल्य १६.९९ लाख रुपैयाँ तोकिएको छ भने ‘इम्पावर्ड एक्स ५५’ को १९.१९ लाख रुपैयाँ र ‘डार्क एडिसन’ को १९.४९ लाख रुपैयाँ निर्धारण गरिएको छ। यी गाडीहरू पाँच विभिन्न रङ विकल्पमा उपलब्ध हुनेछन्, जसमा ‘नाइट्रो क्रिमसन’ र ‘डार्क’ संस्करण विशेष रूपमा आकर्षक मानिएका छन्।

टाटा मोटर्सका प्रमुख वाणिज्य अधिकारी विवेक श्रीवत्सब ले यस नयाँ सिरिजले विद्युतीय सवारीलाई अझ सहज र उपयोगी बनाउँदै मिड–एसयूभी सेग्मेन्टमा नयाँ मापदण्ड स्थापित गर्ने विश्वास व्यक्त गरेका छन्।