काठमाडौँ । दाङको घोराहीमा सञ्चालित सोनापुर मिनरल एण्ड आयल प्रालिले लोडसेडिङको समयमा डेडिकेटेड तथा ट्रंक लाइनबाट विद्युत् उपभोग गरेको प्रिमियम महसुलको बक्यौता रकम मंगलबार तिरेको छ ।

कुल २४ करोड २९ लाख ९९ हजार रुपैयाँ बक्यौता रहेको कम्पनीले उक्त रकमलाई २८ किस्तामा विभाजन गरी भुक्तानी गर्ने सहमति गरेको हो । यसअनुसार, कम्पनीले पहिलो किस्ताका रूपमा ८६ लाख ३० हजार रुपैयाँ बुझाएको छ ।

पहिलो किस्ता तिरेसँगै गत ७ कात्तिकमा विच्छेद गरिएको विद्युत् लाइन मंगलबार साँझ पुनः जडान गरिएको नेपाल विद्युत् प्राधिकरणले जनाएको छ ।

सोनापुर मिनरलले २०७२ माघदेखि २०७५ वैशाखसम्मको अवधिमा डेडिकेटेड तथा ट्रंक लाइनमार्फत विद्युत् उपभोग गरेको थियो । उक्त अवधिको प्रिमियम महसुल नतिरेका कारण कम्पनीको लाइन काटिएको थियो ।

विद्युत् महसुल बक्यौता भुक्तानीसँगै कम्पनीको उत्पादन कार्य पुनः सहज रूपमा सञ्चालन हुने अपेक्षा गरिएको छ ।