काठमाडौं । रोयल इन्फिल्डको सीमित संस्करण शटगन ६५० रफ क्राफ्ट्स (Shotgun 650 x Rough Crafts Edition) विश्वभरका मोटरसाइकल पारखीमाझ अत्यधिक लोकप्रिय बनेको छ। कम्पनीले उत्पादन गरेका सबै १०० वटा सीमित संस्करण सार्वजनिक भएको छोटो समयमै पूर्ण रूपमा बिक्री भएका छन्।

भारतका लागि छुट्याइएका २५ वटा मोटरसाइकल मात्र बुकिङ खुलाएको तीन मिनेटमै बिक्री भएका हुन्। ५ लाख ७५ हजार भारतीय रुपैयाँ मूल्य निर्धारण गरिए पनि यस विशेष संस्करणप्रति उपभोक्ताको उत्साह निकै उच्च देखिएको छ।

ताइवानको चर्चित कस्टम मोटरसाइकल निर्माता रफ क्राफ्ट्स (Rough Crafts) सँगको सहकार्यमा तयार पारिएको यो मोडल पहिलो पटक इटालीको EICMA 2025 मा प्रदर्शन गरिएको थियो। पछि यसलाई Motoverse 2025 मा समेत प्रदर्शनीमा राखिएको थियो।

आकर्षक डिजाइन

शटगन ६५० रफ क्राफ्ट्सलाई कुनै यान्त्रिक परिवर्तन नगरी विशेष डिजाइन र फिनिसिङमार्फत फरक पहिचान दिइएको छ। यसमा ग्लोस जेट ब्ल्याक र म्याट स्टेल्थ ब्ल्याक रंगको संयोजन, हातले बनाइएको सुनौलो स्ट्रिप, हल्का खैरो डिटेलिङ, सुनौलो फिनिस भएका USD फ्रन्ट फोर्क, कन्ट्रास्ट-कट एलोय ह्विल, ब्ल्याक बार-इन्ड मिरर तथा प्रिमियम छालाको सिट प्रयोग गरिएको छ।

इन्धन ट्याङ्कीमा प्रत्येक मोटरसाइकलको क्रम संख्या उल्लेख गरिएको छ भने पित्तलबाट बनेको Rough Crafts सहकार्यको विशेष ब्याज समेत राखिएको छ।

यसका खरिदकर्ताले Rough Crafts का संस्थापक विन्स्टन येह ले हस्ताक्षर गरेको सीमित संस्करणको कलाकृति (Artwork) पनि उपहारस्वरूप प्राप्त गर्नेछन्।

६४८ सीसी ट्विन–सिलिन्डर इन्जिन

मोटरसाइकलमा रोयल इन्फिल्डको ६४८ सीसी, एयर तथा आयल–कुल्ड, प्यारलल–ट्विन इन्जिन प्रयोग गरिएको छ। यसले ४७ हर्सपावर र ५२.३ एनएम टर्क उत्पादन गर्छ। इन्जिनसँग ६–स्पीड गियरबक्स जोडिएको छ।

कम्पनीका अनुसार विश्वभरबाट ९ हजारभन्दा बढी मोटरसाइकल पारखीले यो सीमित संस्करण खरिद गर्न रुचि देखाएका थिए। सबै १०० वटा युनिट बिक्री भएसँगै शटगन ६५० रफ क्राफ्ट्स रोयल इन्फिल्डको सबैभन्दा छिटो बिक्री हुने विशेष संस्करणमध्ये एक बनेको छ।