काठमाडौं । चिनियाँ विद्युतीय सवारीसाधन निर्माता बीवाइडी (BYD) को नयाँ इलेक्ट्रिक एसयूभी ‘युआन प्लस’ ले बजारमा सार्वजनिक भएको पहिलो हप्तामै उल्लेखनीय सफलता हासिल गरेको छ। अन्तर्राष्ट्रिय बजारमा ‘एटो ३’ नामले परिचित यस गाडीको तेस्रो पुस्ताको मोडल सार्वजनिक भएको सात दिनभित्रै ३० हजारभन्दा बढी बुकिङ प्राप्त भएको कम्पनीले जनाएको छ।

बीवाइडीको ‘डायनास्टी सेरिज’ का महाप्रबन्धक लु तियानका अनुसार नयाँ युआन प्लस गत मार्च २१ मा चिनियाँ बजारमा औपचारिक रूपमा सार्वजनिक गरिएको थियो। बजारमा आएलगत्तै ग्राहकबाट उत्साहजनक प्रतिक्रिया पाएको यो मोडल आधुनिक प्रविधि, आकर्षक डिजाइन र उन्नत कार्यक्षमताका कारण लोकप्रिय बन्दै गएको कम्पनीको दाबी छ।

चीनमा यसको प्रारम्भिक मूल्य १ लाख १९ हजार ९०० युआन (करिब १७ हजार ६०० अमेरिकी डलर) निर्धारण गरिएको छ। गाडीमा बीवाइडीको नयाँ ‘ब्लेड ब्याट्री २.०’ र ‘फ्ल्याश चार्जिङ’ प्रविधि जडान गरिएको छ। ५७.५ किलोवाट आवर र ६८.५ किलोवाट आवरका दुई ब्याट्री विकल्पमा उपलब्ध यस एसयूभीले एकपटकको पूर्ण चार्जमा क्रमशः ५४० किलोमिटर र ६३० किलोमिटरसम्मको रेन्ज प्रदान गर्ने कम्पनीको दाबी छ।

नयाँ युआन प्लसको मुख्य आकर्षण यसको अल्ट्रा–फास्ट चार्जिङ क्षमता हो। कम्पनीका अनुसार फ्ल्याश चार्जिङ प्रविधिको सहायताले गाडीलाई १० प्रतिशतबाट ७० प्रतिशतसम्म चार्ज गर्न केवल ५ मिनेट लाग्छ भने १० प्रतिशतबाट ९७ प्रतिशतसम्म चार्ज हुन करिब ९ मिनेट पर्याप्त हुन्छ। माइनस ३० डिग्री सेल्सियसजस्तो अत्यधिक चिसो मौसममा समेत ब्याट्रीले १२ मिनेटमै २० प्रतिशतबाट ९७ प्रतिशतसम्म चार्ज हुने क्षमता राख्ने बताइएको छ।

सुरक्षा र प्रविधिको दृष्टिले पनि यो गाडी निकै उन्नत मानिएको छ। पछाडिको इलेक्ट्रिक मोटरले २६८ देखि ३२१ हर्सपावरसम्म शक्ति उत्पादन गर्छ। ग्राहकले अतिरिक्त शुल्क तिरेर ‘डि–पाइलट ३००’ एडास प्रणाली जडान गर्न सक्नेछन्, जसमा लिडार सेन्सर, ३० वटा क्यामरा तथा सेन्सर समावेश छन्। यसले सहरी तथा राजमार्ग यात्रामा असिस्टेड ड्राइभिङ र अटोमेटेड पार्किङलाई सहज बनाउँछ। १५.६ इन्चको फ्लोटिङ इन्फोटेनमेन्ट स्क्रिन, एआई भ्वाइस असिस्टेन्ट, रेफ्रिजरेटर, हेड–अप डिस्प्ले तथा रिक्लाइनिङ सिटजस्ता प्रिमियम सुविधाले पनि गाडीलाई थप आकर्षक बनाएको छ। प्रतिस्पर्धी मोडलहरू बजारमा आए पनि बीवाइडीले आफ्नो नयाँ ब्याट्री तथा द्रुत चार्जिङ प्रविधिका कारण इलेक्ट्रिक एसयूभी बजारमा बलियो उपस्थिति कायम राखेको छ।