काठमाडौं । मुस्लिम समुदायले प्रधानमन्त्रीको पछिल्लो अभिव्यक्तिप्रति गम्भीर ध्यानाकर्षण जनाएको छ। मंसिर ९ गते इकान्तिपुरमा प्रकाशित भिडियोमा प्रधानमन्त्रीले मुस्लिम समुदाय र मुस्लिम महिलाबारे व्यक्त गरेको टिप्पणीलाई समुदायले ऐतिहासिक रूपमा असत्य, भ्रामक र विभाजनकारी ठहर गरेको छ।

समुदायका प्रतिनिधिहरूको पत्रअनुसार, प्रधानमन्त्रीले भारत र अरब क्षेत्रमा मुस्लिम शासन र महिलाको अधिकारबारे गरेका टिप्पणीहरू तथ्य र इतिहासमा आधारित नभएको, साथै नेपालको बहुसांस्कृतिक र बहुधार्मिक समाजमा सामाजिक सद्भावमा नकारात्मक प्रभाव पार्ने खालको भएको बताइएको छ।

पत्रमा भनिएको छ कि मुस्लिम समुदायले सदैव शान्ति, सहिष्णुता र संविधानमा निहित समानताप्रतिको निष्ठा देखाउँदै आएको छ। तर प्रधानमन्त्रीज्यूको अभिव्यक्तिले समुदायको धार्मिक पहिचान, परम्परा र सामाजिक संरचनाबारे गलत बुझाइ फैलाउने जोखिम रहेको उल्लेख गरिएको छ।

समुदायले यसअघिको अभिव्यक्तिलाई फिर्ता लिई तथ्यमा आधारित स्पष्ट स्पष्टीकरण सार्वजनिक गर्न र सामाजिक सद्भाव, समावेशी शासन र राष्ट्रिय हितप्रति आफ्नो प्रतिबद्धता प्रकट गर्न प्रधानमन्त्रीज्यूसँग विनम्र अनुरोध गरेको छ।

पत्रमा मुस्लिम समुदाय आफैंले आफ्ना परम्परा र सामाजिक संरचनाभित्रका कमजोरी सुधार गर्ने प्रतिबद्धता जनाएको छ र महिलाको अधिकार, शिक्षा र सशक्तिकरण प्रवर्द्धन गर्ने कार्य निरन्तर अघि बढाइरहेको बताइएको छ।