काठमाडौं । लिबर्टी माइक्रो लाइफ इन्स्योरेन्स लिमिटेडको खुद नाफामा गत आर्थिक वर्ष २०८२/८३ मा भारी गिरावट आएको छ। कम्पनीले चौथो त्रैमाससम्ममा ४ लाख ६२ हजार २४८ रुपैयाँ खुद नाफा आर्जन गरेको छ।

कम्पनीले सार्वजनिक गरेको अपरिष्कृत वित्तीय विवरणअनुसार समीक्षा अवधिमा खुद नाफा अघिल्लो आर्थिक वर्षको तुलनामा ९५.९८ प्रतिशतले घटेको हो। अघिल्लो वर्षको सोही अवधिमा कम्पनीले १ करोड १४ लाख ९७ हजार ४६२ रुपैयाँ खुद नाफा आर्जन गरेको थियो।

नाफामा ठूलो गिरावट आए पनि कम्पनीको बीमा व्यवसाय भने विस्तार भएको छ। समीक्षा अवधिमा कम्पनीले ८३ करोड १८ लाख ६७ हजार रुपैयाँ कुल बीमाशुल्क आर्जन गरेको छ। अघिल्लो वर्ष यस्तो रकम ५४ करोड ७३ लाख ३० हजार रुपैयाँ रहेको थियो।

त्यस्तै, पुनर्बीमा रकम कटौतीपछि कम्पनीको खुद बीमाशुल्क आर्जन ४४ करोड १३ लाख ३२ हजार रुपैयाँ पुगेको छ। अघिल्लो आर्थिक वर्षमा खुद बीमाशुल्क आर्जन २७ करोड १४ लाख ६९ हजार रुपैयाँ रहेको थियो।

कम्पनीको जीवन बीमा कोषमा भने उल्लेख्य वृद्धि भएको छ। समीक्षा अवधिमा जीवन बीमा कोष ४४ करोड ८२ लाख ६० हजार रुपैयाँ पुगेको छ। अघिल्लो वर्ष यस्तो कोष १९ करोड २६ लाख १९ हजार रुपैयाँ रहेको थियो।

यस्तै, कम्पनीको महाविपत्ति कोषमा ८ लाख ६७ हजार १४४ रुपैयाँ सञ्चित रहेको छ। शेयर प्रिमियम खातामा भने शून्य रकम रहेको छ भने जगेडा तथा अन्य इक्विटी शीर्षकमा १ करोड ८१ लाख ५१ हजार रुपैयाँ कायम रहेको वित्तीय विवरणमा उल्लेख छ।

नाफामा आएको भारी गिरावटको असर कम्पनीको प्रतिशेयर आम्दानी (ईपीएस) मा समेत परेको छ। समीक्षा अवधिमा कम्पनीको वार्षिकीकृत ईपीएस ९ पैसा कायम भएको छ। अघिल्लो वर्ष यस्तो ईपीएस २ रुपैयाँ १९ पैसा रहेको थियो।

समग्रमा, लिबर्टी माइक्रो लाइफको बीमा व्यवसाय र जीवन बीमा कोषमा उल्लेख्य वृद्धि भए पनि नाफामा आएको ठूलो गिरावटले कम्पनीको वित्तीय प्रदर्शनमा दबाब देखाएको छ।