भरतपुर, चितवन । कालिका पावर कम्पनी लिमिटेडको १८औँ वार्षिक साधारण सभा आज भरतपुर, चितवनमा सम्पन्न भएको छ। सभाले कम्पनीको संचित मुनाफाबाट सेयरधनीलाई ७ प्रतिशत बोनस शेयर वितरण गर्ने प्रस्ताव सर्वसम्मत रूपमा पारित गरेको छ।
सभामा कम्पनीको आर्थिक अवस्था, हालसम्मका उपलब्धि तथा भावी योजना बारे विस्तृत छलफल गरिएको थियो। कम्पनीले विद्युत उत्पादन तथा व्यवस्थापनमा सुधार गर्दै आगामी दिनमा थप सुदृढ ढंगले अगाडि बढ्ने प्रतिबद्धता व्यक्त गरेको छ।

साधारण सभामा सञ्चालक समितिको तर्फबाट प्रस्तुत वार्षिक प्रतिवेदन, लेखापरीक्षकको प्रतिवेदन तथा आर्थिक विवरणहरू पनि अनुमोदन गरिएको छ। साथै, कम्पनीको दीर्घकालीन विकास र सेयरधनीको हितलाई प्राथमिकतामा राख्दै नीति तथा कार्यक्रम अघि बढाइने जानकारी दिइयो।

सभामा सहभागी सेयरधनीहरूले कम्पनीको निरन्तर प्रगति र बोनस शेयर प्रस्तावप्रति सन्तुष्टि व्यक्त गर्दै व्यवस्थापन टोलीलाई सफल कार्यकालको शुभकामना दिएका छन्।