काठमाडौं ।  गुराँस लघुवित्त वित्तीय संस्थाले चालु आर्थिक वर्ष २०८२/८३ को पहिलो त्रैमासमा १ करोड ४४ लाख ८८ हजार रुपैयाँ खुद नाफा आर्जन गरेको छ। कम्पनीले बुधवार सार्वजनिक गरेको त्रैमासिक वित्तीय विवरणअनुसार, यो नाफा गत आवको सोही अवधिको तुलनामा ४२.५७ प्रतिशतले बढी हो। गत वर्ष सोही अवधिमा कम्पनीले १ करोड १ लाख रुपैयाँ नाफा कमाएको थियो।

मुख्य सूचकांकहरूमा वृद्धि

समिक्षा अवधिमा गुराँस लघुवित्तको खुद ब्याज आम्दानी ३६.७३ प्रतिशतले बढेर ४ करोड २९ लाख रुपैयाँ पुगेको छ। त्यस्तै, संचालन नाफा पनि ३९.५४ प्रतिशत वृद्धि भई २ करोड २ लाख रुपैयाँ पुगेको उल्लेख छ। ब्याज र संचालन आम्दानीमा वृद्धि भएपछि खुद नाफा पनि उल्लेख्य रूपमा बढेको देखिन्छ।

कम्पनीको पहिलो त्रैमासमा वितरणयोग्य नाफा ६४ लाख २२ हजार रुपैयाँ कायम भएको छ।

प्रति सेयर सूचकांक र कर्जा अवस्था

यो अवधिमा प्रति सेयर आम्दानी (EPS) १४.९३ रुपैयाँले वृद्धि भई ५०.०२ रुपैयाँ पुगेको छ भने प्रति सेयर नेटवर्थ १७२.१८ रुपैयाँ कायम भएको छ।
खराब कर्जा दर पनि केही सुधार भई ३.१३ प्रतिशतमा पुगेको वित्तीय विवरणमा उल्लेख छ।

गुराँस लघुवित्तको हाल चुक्ता पुँजी ११ करोड ५८ लाख रुपैयाँ रहेको छ भने जगेडा तथा कोषमा ८ करोड ३७ लाख रुपैयाँ राखिएको छ।

समग्रमा, समिक्षा अवधिको नतिजाले गुराँस लघुवित्तले स्थिर वित्तीय वृद्धि कायम राख्दै लगानीकर्ताको विश्वास बढाएको देखिन्छ।