काठमाडौं। चिनियाँ अटोमोबाइल निर्माता बीवाईडी (BYD) ले आफ्नो प्रिमियम लक्जरी ब्रान्ड याङवाङ (Yangwang) अन्तर्गत नयाँ फ्ल्यागसिप एसयूभी याङवाङ यू८एल स्नोक्रेस्ट एडिसन (Yangwang U8L Snowcrest Edition) सार्वजनिक गरेको छ। चार सिट क्षमताको यो सुपर लक्जरी एसयूभीलाई कम्पनीले हालसम्मकै सबैभन्दा प्रिमियम र विलासी मोडलका रूपमा प्रस्तुत गरेको हो।

अन्तर्राष्ट्रिय अटोमोटिभ सञ्चारमाध्यमका अनुसार यस रेन्ज–एक्सटेन्डेड एसयूभीको मूल्य १.८ मिलियन चिनियाँ युआन (करिब २ लाख ६६ हजार अमेरिकी डलर) तोकिएको छ। नेपाली रुपैयाँमा यसको मूल्य करिब साढे ३ करोड रुपैयाँ बराबर पर्न आउँछ।

नयाँ यू८एल स्नोक्रेस्ट एडिसन आकर्षक सिल्भर र गोल्ड रङको संयोजनमा तयार गरिएको छ। यसको अगाडिको भागमा रहेको ब्रान्ड लोगो सक्कली सुनबाट निर्मित रहेको कम्पनीले जनाएको छ। साथै, आधुनिक सुरक्षा प्रणालीका लागि अत्याधुनिक लिडार (LiDAR) सेन्सर समेत जडान गरिएको छ।

गाडीको भित्री भागलाई विशेष रूपमा लक्जरी अनुभव प्रदान गर्ने गरी डिजाइन गरिएको छ। दोस्रो पंक्तिमा दुईवटा छुट्टाछुट्टै रोयल्टी सिट, सिटबीच ठूलो सेन्टर कन्सोल, टचस्क्रिन कन्ट्रोल, मिनी फ्रिज तथा विभिन्न स्टोरेज कम्पार्टमेन्ट उपलब्ध छन्।

प्राविधिक रूपमा करिब ५.४ मिटर लम्बाइ भएको यो एसयूभीमा २.० लिटर टर्बोचार्ज्ड पेट्रोल इन्जिन र ५६.५८ किलोवाट–आवर ब्लेड ब्याट्री प्रयोग गरिएको छ। यसमा जडान गरिएका चारवटा विद्युतीय मोटरले संयुक्त रूपमा ८८० किलोवाट (करिब १,१८० हर्सपावर) शक्ति उत्पादन गर्छन्।

कम्पनीका अनुसार गाडीले ० देखि १०० किलोमिटर प्रतिघण्टाको गति ३.६ सेकेन्डमै हासिल गर्न सक्छ। यसको कुल ड्राइभिङ रेन्ज करिब १,००० किलोमिटर रहेको दाबी गरिएको छ।

यसमा DiSus-P हाइड्रोलिक सस्पेन्सन प्रणाली, कार्बन–सेरामिक ब्रेक, उन्नत ड्राइभिङ सहायता प्रणाली तथा प्रिमियम कम्फर्ट फिचरहरू समावेश गरिएका छन्। बीवाईडीले यो मोडलमार्फत विश्व लक्जरी एसयूभी बजारमा आफ्नो प्रतिस्पर्धात्मक उपस्थिति थप मजबुत बनाउने लक्ष्य राखेको जनाएको छ।