काठमाडौं । एनएमबि बैंकले आफ्नो डिजिटल रूपान्तरणअन्तर्गत अनलाइन कर्जा आवेदन तथा ट्र्याकिङ प्रणाली सञ्चालनमा ल्याएको छ। नयाँ व्यवस्थासँगै ग्राहकले कर्जाका लागि आवेदन दिन तथा आवेदनको अवस्था बुझ्न पटक–पटक बैंकको शाखा धाउनुपर्ने झन्झट कम हुने भएको छ।

बैंकका अनुसार नयाँ डिजिटल पोर्टलमार्फत ग्राहकले जुनसुकै स्थान र उपकरणबाट कर्जाका लागि आवेदन दिन सक्नेछन्। साथै, आवेदन कुन चरणमा पुगेको छ भन्ने जानकारी रियल–टाइममा अनलाइनबाटै ट्र्याक गर्न सकिनेछ।

कसरी दिने अनलाइन कर्जा आवेदन ?

अनलाइन कर्जाका लागि ग्राहकले एनएमबि बैंकको मा गएर ‘लोन सर्भिसेज’ छनोट गर्नुपर्नेछ। त्यसपछि ‘एक्सप्लोर प्रडक्ट्स’ मा क्लिक गरी आफूलाई आवश्यक कर्जा छनोट गर्न सकिनेछ।

कर्जा छनोट गरेपछि आवश्यक विवरण भरेर आवेदन बुझाउनुपर्नेछ। आवेदन पेश गरेलगत्तै ग्राहकले युनिक अनलाइन लोन ट्र्याकिङ आईडी प्राप्त गर्नेछन्। उक्त आईडी प्रयोग गरी कर्जा आवेदनको अवस्था अनलाइनबाटै हेर्न सकिने बैंकले जनाएको छ।

कागजी प्रक्रिया र शाखा धाउने झन्झट घट्ने

बैंकका अनुसार नयाँ प्रणालीले कर्जा आवेदन प्रक्रियामा हुने म्यानुअल काम तथा कागजी प्रक्रिया घटाउनुका साथै ग्राहकको समय बचत गर्नेछ। यसबाट आवेदन प्रक्रियामा पारदर्शिता बढ्नुका साथै कर्जा सेवाको टर्नअराउन्ड टाइम घटाउन समेत सहयोग पुग्ने बैंकको अपेक्षा छ।

डिजिटल माध्यमबाट कर्जा प्रक्रियालाई अघि बढाउँदा कागजको प्रयोगसमेत घट्ने भएकाले बैंकले यसलाई वातावरणमैत्री तथा दिगो बैंकिङ सेवातर्फको कदमका रूपमा लिएको छ।

एनएमबि बैंकले यो सेवा खुद्रा तथा व्यावसायिक दुवै ग्राहकलाई लक्षित गरी सञ्चालनमा ल्याएको जनाएको छ। बैंकले डिजिटल बैंकिङलाई प्राथमिकता दिँदै देशभर १९७ शाखा, १७६ एटीएम र ९ एक्सटेन्सन काउन्टरमार्फत सेवा प्रदान गर्दै आएको छ।

नयाँ प्रणालीसँगै कर्जा आवेदनको अवस्था बुझ्न पटक–पटक शाखा पुग्नुपर्ने अवस्थाको अन्त्य हुने र ग्राहकले आफ्नो आवेदनको प्रगति आफैं अनलाइनबाट निगरानी गर्न सक्ने बैंकको भनाइ छ।