काठमाडौं । गार्डियन माइक्रो लाइफ इन्स्योरेन्स कम्पनीको गत आर्थिक वर्ष २०८२/८३ मा नाफा बाहेक अधिकांश वित्तीय सूचकमा सुधार देखिएको छ। कम्पनीको बीमा कोष र बीमाशुल्क आर्जनमा उल्लेख्य वृद्धि भएको छ।

शनिबार प्रकाशित कम्पनीको अपरिष्कृत वित्तीय विवरणअनुसार समीक्षा अवधिमा कम्पनीको खुद नाफा भने ३२.८३ प्रतिशतले घटेर १ करोड ६० लाख रुपैयाँमा झरेको छ। अघिल्लो आर्थिक वर्ष २०८१/८२ मा कम्पनीले २ करोड ३९ लाख रुपैयाँ खुद नाफा आर्जन गरेको थियो।

यता, कम्पनीको जीवन बीमा कोषको आकार भने १९७ प्रतिशतले बढेर ४४ करोड ९१ लाख रुपैयाँ पुगेको छ। अघिल्लो वर्ष यस्तो कोषमा २१ करोड ४९ लाख रुपैयाँ रहेको थियो।

समीक्षा अवधिमा कम्पनीको कुल बीमाशुल्क आर्जन २७.५५ प्रतिशतले वृद्धि हुँदै ५८ करोड ४३ लाख रुपैयाँ पुगेको छ। अघिल्लो आर्थिक वर्षमा कम्पनीले ४५ करोड ८१ लाख रुपैयाँ कुल बीमाशुल्क आर्जन गरेको थियो।

त्यस्तै, कम्पनीको खुद बीमाशुल्क आर्जन पनि २३ प्रतिशतले बढेर ४९ करोड ३४ लाख रुपैयाँ पुगेको छ। अघिल्लो वर्ष कम्पनीले ३९ करोड ९६ लाख रुपैयाँ खुद बीमाशुल्क आर्जन गरेको थियो।

७५ करोड रुपैयाँ चुक्ता पुँजी रहेको कम्पनीको वार्षिकीकृत प्रतिशेयर आम्दानी (ईपीएस) २ रुपैयाँ १४ पैसा रहेको छ। समीक्षा अवधिमा कम्पनीको प्रतिशेयर नेटवर्थ १०४ रुपैयाँ ६१ पैसा कायम भएको छ।

समीक्षा वर्षको अन्त्यसम्म कम्पनीको महाविपत्ति कोषमा ४१ लाख ९१ हजार रुपैयाँ, रिटेन्ड अर्निङमा ३ करोड १ लाख रुपैयाँ र अन्य इक्विटीमा २ करोड २ लाख रुपैयाँ सञ्चित रहेको वित्तीय विवरणमा उल्लेख छ।

समग्रमा, गार्डियन माइक्रो लाइफको बीमा कोष र बीमाशुल्क आर्जनमा उल्लेख्य वृद्धि भए पनि नाफामा आएको गिरावट कम्पनीका लागि चुनौतीका रूपमा देखिएको छ।