काठमाडौं। नेपालमा सार्वजनिक हुने तयारीमा रहेको दिपल निभो क्यू०५ (Deepal Nevo Q05) ले प्रतिष्ठित गोल्डेन ए’ डिजाइन अवार्ड प्राप्त गरेको छ। आधुनिक डिजाइन, नवीनता र प्रयोगकर्ताकेन्द्रित अवधारणाका कारण यो प्रिमियम एसयूभीले अन्तर्राष्ट्रिय स्तरको सम्मान हासिल गरेको हो।

‘गोल्डेन ए’ डिजाइन अवार्ड असाधारण सिर्जनशीलता, प्राविधिक उत्कृष्टता र प्रभावकारी डिजाइन प्रस्तुत गर्ने उत्पादनलाई प्रदान गरिने प्रतिष्ठित अन्तर्राष्ट्रिय सम्मान हो। परम्परागत सोचलाई चुनौती दिने, सम्बन्धित विधामा नयाँ दिशा दिने तथा डिजाइन र प्रविधिमार्फत उल्लेखनीय मूल्य सिर्जना गर्ने क्षमताका आधारमा विजेता छनोट गरिन्छ। यस उपलब्धिसँगै निभो क्यू०५ डिजाइन उत्कृष्टताको नयाँ मापदण्ड स्थापित गर्ने विश्वव्यापी उत्पादनहरूको सूचीमा समावेश भएको कम्पनीले जनाएको छ।

चांगान ग्लोबल डिजाइन सेन्टरले विकास गरेको निभो क्यू०५ ले चांगान अटोमोबाइलको स्मार्ट तथा न्यून-कार्बन मोबिलिटी कम्पनी बन्ने दीर्घकालीन रणनीतिलाई प्रतिबिम्बित गर्ने बताइएको छ। सन् १९९६ मा स्थापना भएको उक्त डिजाइन सेन्टरले अग्रगामी अनुसन्धान, उत्पादन डिजाइन, डिजिटल मोडलिङ, प्रयोगकर्ता अनुभव, रंग तथा सामग्री छनोट, इन्जिनियरिङ र गुणस्तर व्यवस्थापनलगायतका क्षेत्रमा विशेषज्ञता हासिल गरेको छ।

कम्पनीका अनुसार निभो ब्रान्ड चांगानको भावी रणनीतिको प्रमुख आधार हो। यसलाई आम परिवारका लागि ‘स्मार्ट मोबिलिटी कम्प्यानियन’का रूपमा विकास गरिएको छ। फराकिलो स्पेस, व्यवहारिक उपयोगिता, स्मार्ट प्रविधि, आरामदायी यात्रा, भरपर्दो रेन्ज, सहज चार्जिङ र प्रतिस्पर्धी मूल्यमा नयाँ पुस्ताका विद्युतीय सवारीसाधन उपलब्ध गराउनु ब्रान्डको उद्देश्य रहेको कम्पनीले जनाएको छ।

यो अवार्डले आधुनिक जीवनशैलीअनुकूल नयाँ पुस्ताको एसयूभीका रूपमा निभो क्यू०५ को पहिचान अझ सुदृढ बनाएको छ। यसको डिजाइनले आकर्षक तथा आधुनिक रोड प्रेजेन्सलाई पारिवारिक प्रयोगको आवश्यकतासँग सन्तुलित रूपमा संयोजन गरेको कम्पनीको दाबी छ।

१६३ वर्षको औद्योगिक इतिहास र ४१ वर्षको अटोमोबाइल उत्पादन अनुभव बोकेको चांगानले विश्वस्तरीय अटोमोबाइल ब्रान्ड बन्ने यात्रालाई तीव्रता दिइरहेको जनाएको छ। दिपल निभो क्यू०५ आगामी नाडा अटो शो मार्फत नेपाली बजारमा औपचारिक रूपमा सार्वजनिक गरिने तयारी छ।