काठमाडौं । विश्वव्यापी अटोमोबाइल ब्रान्ड जीडब्लुएम (Great Wall Motor) अन्तर्गतको प्रिमियम इलेक्ट्रिक एसयूभी ‘ओरा ५ ईभी’ नेपाली बजारमा औपचारिक रूपमा सार्वजनिक गरिएको छ। काठमाडौंस्थित द प्लाजामा आयोजित विशेष समारोहबीच उक्त गाडी सार्वजनिक गरिएको हो।

कम्पनीका अनुसार चीन र थाइल्यान्डपछि नेपाललाई ओरा ५ ईभीको अन्तर्राष्ट्रिय विस्तारका महत्वपूर्ण बजारमध्ये एकका रूपमा छनोट गरिएको छ। ‘Designed with Intelligence, Shaped by Elegance’ अवधारणामा आधारित यो विद्युतीय एसयूभीमा आधुनिक प्रविधि, आकर्षक डिजाइन, उच्च सुरक्षा मापदण्ड तथा प्रिमियम सुविधाहरू समावेश गरिएको छ। अन्तर्राष्ट्रिय बजारमा सकारात्मक प्रतिक्रिया प्राप्त गरिसकेको यो मोडलले नेपाली विद्युतीय सवारी बजारमा नयाँ आयाम थप्ने विश्वास कम्पनीले व्यक्त गरेको छ।

नेपालका लागि जीडब्लुएमको आधिकारिक आयातकर्ता भिजी इम्पेक्स प्रालिले नेपाली ग्राहकको आवश्यकता, सडक अवस्था तथा आधुनिक जीवनशैलीलाई ध्यानमा राख्दै ओरा ५ ईभी सार्वजनिक गरिएको जनाएको छ। कम्पनीका अनुसार यो गाडीले सुरक्षित, स्मार्ट तथा दिगो मोबिलिटीको अनुभव प्रदान गर्नेछ।

ओरा ५ ईभी दुई भेरियन्टमा उपलब्ध रहेको छ। सार्वजनिक गरिएको विशेष प्रारम्भिक मूल्यअनुसार मिड भेरियन्टको मूल्य ४६ लाख ९९ हजार रुपैयाँ तथा टप भेरियन्टको मूल्य ५१ लाख ९९ हजार रुपैयाँ निर्धारण गरिएको छ। कम्पनीले प्रतिस्पर्धी मूल्यमा प्रिमियम सुविधासहितको विद्युतीय एसयूभी उपलब्ध गराएको दाबी गरेको छ।

गाडीको प्रमुख विशेषतामध्ये एकपटकको पूर्ण चार्जमा अधिकतम ५२० किलोमिटरसम्मको ड्राइभिङ रेन्ज रहेको छ। यसमा २०० एमएम ग्राउन्ड क्लियरेन्स, प्यानोरामिक सनरुफ, प्रिमियम सिट, ३६० डिग्री सराउन्ड भ्यु क्यामेरा, १८० डिग्री च्यासिस भ्यु क्यामेरा तथा सेल्फ–हिलिङ पेन्ट टेक्नोलोजी जस्ता अत्याधुनिक सुविधाहरू समावेश छन्।

सुरक्षाका दृष्टिले ओरा ५ ईभीले ५-स्टार एएनक्याप (ANCAP) तथा ५-स्टार युरो एनक्याप (Euro NCAP) सुरक्षा रेटिङ प्राप्त गरेको कम्पनीले जनाएको छ। गाडीमा २५ भन्दा बढी एड्भान्स्ड ड्राइभर असिस्टेन्स सिस्टम (ADAS) फिचर, लेन किप असिस्ट, अटोमेटिक इमर्जेन्सी ब्रेकिङ, एडाप्टिभ क्रुज कन्ट्रोल, ट्राफिक साइन रिकग्निसन लगायतका आधुनिक सुरक्षा प्रविधिहरू उपलब्ध छन्। साथै यात्रुलाई सहजता प्रदान गर्न ३३ वटा स्टोरेज स्पेस पनि राखिएको छ।

जीडब्लुएम हाल विश्वका १७० भन्दा बढी देश तथा क्षेत्रमा उपस्थित रहेको छ। कम्पनीले हालसम्म विश्वभर १ करोडभन्दा बढी सवारीसाधन बिक्री गरिसकेको जनाएको छ। ३५ वर्षभन्दा लामो अनुभव, अनुसन्धान तथा विकासमा गरिएको निरन्तर लगानी तथा उत्पादन गुणस्तरका कारण जीडब्लुएम विश्वका अग्रणी अटोमोबाइल ब्रान्डमध्ये एकका रूपमा स्थापित भएको कम्पनीको दाबी छ।

कार्यक्रममा बोल्दै कम्पनीका प्रतिनिधिहरूले नेपालमा विद्युतीय सवारीसाधनको बढ्दो मागलाई सम्बोधन गर्दै विश्वस्तरीय प्रविधि, उच्च सुरक्षा तथा प्रिमियम ड्राइभिङ अनुभव नेपाली ग्राहकसमक्ष ल्याउने प्रतिबद्धता व्यक्त गरेका थिए। उनीहरूले ओरा ५ ईभीले नेपालमा स्मार्ट, सुरक्षित तथा वातावरणमैत्री यातायातको नयाँ मानक स्थापित गर्ने विश्वास समेत व्यक्त गरे।

विश्वव्यापी सफलता, आधुनिक डिजाइन, उत्कृष्ट सुरक्षा मापदण्ड तथा प्रतिस्पर्धी मूल्यका कारण ओरा ५ ईभी नेपाली विद्युतीय सवारी बजारको प्रमुख आकर्षण बन्ने अपेक्षा गरिएको छ। भिजी इम्पेक्स प्रालिले आगामी दिनमा पनि नेपाली बजारमा नवीनतम प्रविधियुक्त तथा अन्तर्राष्ट्रियस्तरका सवारीसाधन उपलब्ध गराउँदै जाने जनाएको छ।