काठमाडौँ । BYD ले सोलिड-स्टेट ब्याट्रीका लागि प्रयोग हुने नयाँ प्रविधिको पेटेन्ट दर्ता गराएको छ। चिनियाँ सञ्चारमाध्यम सिनाका अनुसार चीनको ब्याट्री उद्योग सल्फाइडमा आधारित सोलिड-स्टेट ब्याट्री विकासमा केन्द्रित भइरहेका बेला बीवाईडीको यो कदम सार्वजनिक भएको हो।

चीनको राष्ट्रिय बौद्धिक सम्पत्ति प्रशासनले सार्वजनिक गरेको विवरणअनुसार उक्त पेटेन्ट ‘कम्पोजिट सोलिड इलेक्ट्रोलाइट मेम्ब्रेन’, यसको निर्माण विधि, सोलिड-स्टेट ब्याट्री तथा ब्याट्री प्याकसँग सम्बन्धित रहेको छ।

नयाँ प्रविधिमा साना तथा ठूला दुवै प्रकारका इनअर्गानिक सोलिड इलेक्ट्रोलाइट कणहरूलाई पोलिमर इलेक्ट्रोलाइट फाइबर नेटवर्कको लेपनसँग संयोजन गरिएको छ। कम्पनीका अनुसार यस विशेष संरचनाले ब्याट्रीभित्र प्रयोग हुने इलेक्ट्रोलाइट मेम्ब्रेनको आयोनिक चालकता तथा मेकानिकल मजबुतीमा सुधार ल्याउनेछ।

यद्यपि, पेटेन्ट कागजातमा ब्याट्रीको ऊर्जा घनत्व, चार्जिङ क्षमता, आयु, उत्पादन लागत वा व्यावसायिक उत्पादनको समयरेखाबारे भने विस्तृत जानकारी खुलाइएको छैन।

गत अप्रिलमा BYD का मुख्य वैज्ञानिक Lian Yubo ले कम्पनीको सोलिड-स्टेट ब्याट्री विकास महत्वपूर्ण चरणमा पुगेको बताएका थिए। तर उनले व्यावसायिक उत्पादनअघि इन्जिनियरिङ जटिलता, लागत नियन्त्रण तथा उत्पादन गुणस्तर कायम राख्ने चुनौती अझै बाँकी रहेको उल्लेख गरेका थिए।

उनले उद्योगहरूले केवल ब्याट्री सेल सुधारमा मात्र नभई समग्र ब्याट्री प्रणाली विकासमा ध्यान दिनुपर्ने सुझाव पनि दिएका थिए। बीवाईडीले यसअघि सन् २०२७ आसपासमा सोलिड-स्टेट ब्याट्रीको प्रारम्भिक उत्पादन सुरु गर्ने तथा १० हजार पटकसम्म चार्ज गर्न सकिने तेस्रो पुस्ताको सोडियम–आयन ब्याट्री विकास गर्ने योजना सार्वजनिक गरिसकेको छ।

चीनमा सोलिड-स्टेट ब्याट्री निर्माणको प्रतिस्पर्धा तीव्र बन्दै गएको छ। मार्च महिनामा CALB ले उच्च ऊर्जा घनत्वयुक्त सोलिड-स्टेट ब्याट्रीको नमुना सार्वजनिक गरेको थियो भने Chery Automobile ले सन् २०२७ सम्ममा यस्ता ब्याट्री गाडीमा परीक्षण गर्ने लक्ष्य राखेको छ।

त्यस्तै CATL ले पनि सल्फाइडमा आधारित सोलिड-स्टेट ब्याट्रीको पेटेन्ट दर्ता गर्दै सन् २०२७ सम्ममा प्रारम्भिक उत्पादन सुरु गर्ने जनाएको छ। अर्कोतर्फ GAC Group ले प्रमाणीकरण परीक्षणका लागि साना ब्याचमा यस्ता ब्याट्री उत्पादन सुरु गरिसकेको छ।

ब्याट्री जडानसम्बन्धी तथ्यांकअनुसार सन् २०२५ र २०२६ को अवधिमा बीवाईडी अझै पनि मुख्य रूपमा एलएफपी (लिथियम आइरन फस्फेट) ब्याट्री उत्पादनमै केन्द्रित देखिएको छ।

सन् २०२६ को अप्रिलमा बीवाईडीको ब्याट्री जडान परिमाण १६.८ प्रतिशत बजार हिस्सासहित १०.४९ गिगावाट आवर पुगेको थियो। अघिल्लो वर्षको सोही अवधिमा भने कम्पनीको बजार हिस्सा २२.५ प्रतिशत तथा जडान परिमाण १२.८४ गिगावाट आवर रहेको थियो। त्यतिबेला बीवाईडीले जडान गरेका सम्पूर्ण ब्याट्रीहरू एलएफपी प्रविधिमा आधारित थिए।