भैरहवा । लुम्बिनी प्रदेशको रुपन्देहीमा आम जनता पार्टी (आजपा)का उम्मेदवारहरुले चुनावी भेटघाट एवं छलफललाई तिब्रता दिएका छन् । रुपन्देहीको ५ वटै क्षेत्रमा रहेका उम्मेदवारहरुले चुनावी गतिविधिलाई तिब्रता दिदै घरदैलो अभियानमा जुटेका छन् ।

रुपन्देही–१ बाट बदरु दोजा फकिर, रुपन्देही–३ बाट राधेश्याम गुप्ता, रुपन्देही–४ बाट ज्योति थापा र रुपन्देही–५ बाट खेमप्रसाद गुरुङले चुनावी भेटघाट एवं छलफललाई तिब्रता दिएका छन् ।

रुपन्देहीको समग्र विकासका लागि भैरहवा स्थित गौतमबुद्ध अन्तर्राष्ट्रिय एयरपोर्टलाई चलायमान बनाउने, बेलहिया नाकाको सुरक्षा चुनौतिलाई व्यवस्थित बनाउने, रुपन्देहीको उधोगव्यवसायलाई सुरक्षित एवं व्यवस्थित बनाउदै स्वदेशमै रोजगारीको सृजना गर्ने लगायतका बिषय आजपाका उम्मेदवारले एजेण्डाको रुपमा अगाडी सारेका छन् ।

‘स्थिर, सुशासन र विकासका लागि अबकी बार आजपा सरकार । जनउतरदायी लोकतान्त्रिक अभ्यास र सिस्टम सुधार एवं सुशासनका आधार नै मोबाइल छाप हो । दलतन्त्र बिरुद्ध आम जनताको सरकार अहिलेको आवश्यक्ता हो,’ रुपन्देही–३ का उम्मेदवार गुप्ताले भने ।

जेनजी आन्दोलनका हत्यारा, भ्रष्टाचारी, लुटेरा तथा हाईज्याकरलाई पहिचान गरी जेनजीको माग सम्बोधन गर्नका लागि मोबाइल छापमा मतदान गर्न आजपाका उम्मेदवारले अपिल गरेका छन् । उनीहरुले अहिलेको सिस्टममा सुधारका लागि आजपाका उम्मेदवारलाई बिजयी बनाउनका लागि प्रत्यक्ष र समानुपातिक दुबै तर्फको मतपत्रमा मोबाइलमा मतदान गर्न आम मतदातासंग आग्रह गरेका छन् ।

अहिलेको सिस्टम सुधार, भ्रष्टाचार, कुशासन, सरकारपिच्छेको मनोमानी कर आतंक, अनियमितताको अन्त्यका साथै गुणस्तरीय शिक्षा, स्वास्थ्य, यातायात, रोजगारी, खानेपानी लगायतको विकासका लागि सबै पार्टीमा भएका राम्रा मान्छेहरु एकजुट भएर मोबाइल छापमा मतदान गर्नुपर्ने रुपन्देही–५ का उम्मेदवार खेमप्रसाद गुरुङले बताए ।