काठमाडौं । मुलुकमा कूल विदेशी मुद्रा सञ्चिति २८ खर्ब ६६ अर्ब ४७ करोड रुपैयाँ बराबर पुगेको छ । नेपाल राष्ट्र बैंकले सार्वजनिक गरेको चालु आर्थिक वर्षको पाँच महिनाको विवरणअनुसार, गत असार मसान्तमा २४ खर्ब १४ अर्ब ६४ करोड रुपैयाँ रहेकामा गत मङ्सिर मसान्तमा १८ दशमलव सात प्रतिशतले वृद्धि भई २८ खर्ब ६६ अर्ब रुपैयाँभन्दा माथि पुगेको हो ।

बैंक तथा वित्तीय संस्थामा रहेको विदेशी विनिमय सञ्चिति गत असार मसान्तमा दुई खर्ब ६३ अर्ब चार करोड रुपैयाँ रहेकामा गत मङ्सिर मसान्तमा २७ दशमलव चार प्रतिशतले वृद्धि भई तीन खर्ब ३५ अर्ब रुपैयाँ कायम भएको हो ।

गत मङ्सिर मसान्तको कूल विदेशी मुद्रा विनिमय सञ्चितिमा भारतीय मुद्राको अंश २२ दशमलव दुई प्रतिशत छ । चालु आवको पाँच महिनासम्मको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चितिले २१ दशमलव सात महिनाको वस्तु आयात र १८ दशमलव दुई महिनाको वस्तु तथा सेवा आयात धान्न पर्याप्त रहने देखिन्छ ।

यस्तै, चालु आवको पाँच महिनामा खुद सेवा आय ३६ अर्ब ५४ करोड रुपैयाँले घाटमा छ । अघिल्लो वर्षको सोही अवधिमा खुद सेवा आय २६ अर्ब ६७ करोड रुपैयाँले घाटामा थियो । सेवा खाताअन्तर्गत समीक्षा अवधिमा भ्रमण आय तीन दशमलव सात प्रतिशतले कमी आई ३३ अर्ब ९७ करोड रुपैयाँ कायम भएको छ । अघिल्लो वर्षको सोही अवधिमा यस्तो आय ३५ अर्ब २६ करोड रुपैयाँ थियो ।

विदेश पढ्न जानेले लगे ५६ अर्ब ५२ करोड

त्यस्तै, सो अवधिमा भ्रमण व्यय पाँच दशमलव तीन प्रतिशतले वृद्धि भई ८८ अर्ब ९७ करोड रुपैयाँ पुगेको छ । त्यसमा शिक्षातर्फको व्यय ५६ अर्ब ५२ करोड रुपैयाँ रहेको छ । अघिल्लो वर्षको सोही अवधिमा भ्रमण व्यय ८४ अर्ब ५० करोड रुपैयाँ रहेकामा शिक्षातर्फको व्यय ४७ अर्ब ४५ करोड रुपैयाँ रहेको थियो ।