वीरगञ्ज । इलाका प्रहरी कार्यालय सुगौली बिर्ताले विभिन्न पसलमा अनुगमन तथा कारबाही गर्दै करिब १०० लिटर घरेलु मदिरा बरामद गरी नष्ट गरेको छ।

गोप्य सूचनाका आधारमा इलाका प्रहरी कार्यालय सुगौली बिर्ताबाट परिचालित प्रहरी टोलीले विभिन्न स्थानमा रहेका पसलहरूमा अनुगमन गरी अवैध रूपमा राखिएको घरेलु मदिरा नियन्त्रणमा लिएको हो।

इलाका प्रहरी कार्यालय सुगौली बिर्ताका प्रहरी नायब निरीक्षक जगेश्वर महतोका अनुसार गोप्य सूचनाका आधारमा सञ्चालन गरिएको अपरेसनका क्रममा करिब १०० लिटर घरेलु मदिरा बरामद गरिएको थियो।

बरामद गरिएको मदिरा जनप्रतिनिधि, समाजसेवी तथा सञ्चारकर्मीहरूको रोहबरमा नष्ट गरिएको प्रहरीले जनाएको छ।

घरेलु मदिराको अवैध उत्पादन तथा बिक्री–वितरण नियन्त्रण गर्न प्रहरीले थालेको यस अभियानलाई स्थानीय स्तरमा सकारात्मक रूपमा हेरिएको छ। पछिल्लो समय इलाका प्रहरी कार्यालय सुगौली बिर्ताले अवैध गतिविधि नियन्त्रण तथा शान्ति–सुरक्षा कायम गर्न सक्रियता बढाएको देखिएको छ।

अवैध गतिविधिविरुद्ध प्रहरीको निरन्तर एक्सनले स्थानीयवासीमा सुरक्षा र विश्वासको भावना थप बलियो बनाउने अपेक्षा गरिएको छ।