काठमाडौं । शंकर ग्रुपअन्तर्गतको जगदम्बा मोटर्सले सान्क्सी अटोमोबाइल ग्रुप (स्याकम्यान) सँगको सहकार्यमा नेपालमा स्याकम्यान एक्स ५००० ई ६×४ इलेक्ट्रिक प्राइम मुभर र एक्स ५००० ई ६×४ इलेक्ट्रिक टिपर सार्वजनिक गरेको छ।

यी दुई मोडल सार्वजनिक भएसँगै स्याकम्यानले नेपालको विस्तार हुँदै गएको विद्युतीय हेभी ड्युटी व्यावसायिक सवारीसाधन बजारमा प्रवेश गरेको छ।

भारी सामान ढुवानी तथा लामो दूरीको यातायातलाई लक्षित गरी एक्स ५००० ई इलेक्ट्रिक प्राइम मुभर विकास गरिएको कम्पनीले जनाएको छ। त्यस्तै, एक्स ५००० ई इलेक्ट्रिक टिपर निर्माण, खानी तथा चुनौतीपूर्ण अफ-रोड सञ्चालनका लागि डिजाइन गरिएको हो।

दुवै मोडलमा इलेक्ट्रिक पावरट्रेन, ६×४ ड्राइभट्रेन, फास्ट चार्जिङ, रिजेनेरेटिभ ब्रेकिङ र इन्टेलिजेन्ट ब्याट्री व्यवस्थापन प्रणालीलगायतका प्रविधि समावेश छन्। कम्पनीका अनुसार यी प्रविधिले चुनौतीपूर्ण व्यावसायिक परिस्थितिमा सवारीसाधनको प्रभावकारी तथा भरपर्दो सञ्चालनमा सहयोग पुर्‍याउने उद्देश्य राख्छन्।

सहकार्यबारे शंकर ग्रुपकी निर्देशक दीपा अग्रवालले स्याकम्यानसँगको साझेदारीले नेपालमा अत्याधुनिक विद्युतीय मोबिलिटी समाधान भित्र्याउने कम्पनीको प्रतिबद्धता प्रतिबिम्बित गर्ने बताइन्।

सान्क्सी अटोमोबाइल होल्डिङ ग्रुपका साउथ एसिया जनरल म्यानेजर स्यान्डर्स लीले नेपाल विद्युतीय हेभी ड्युटी सवारीसाधनका लागि सम्भावनायुक्त बजार रहेको बताए। शंकर ग्रुप र जगदम्बा मोटर्ससँगको साझेदारीमार्फत नेपाली बजारमा प्रविधिमा आधारित हेभी ड्युटी समाधान उपलब्ध गराउने लक्ष्य रहेको उनको भनाइ छ।

एक्जेक्युटिभ डाइरेक्टर अखिल गुप्ताका अनुसार स्याकम्यान एक्स ५००० ई जगदम्बा मोटर्सको व्यावसायिक सवारीसाधन पोर्टफोलियोमा महत्वपूर्ण थप हो। यातायात, निर्माण तथा औद्योगिक क्षेत्रका बदलिँदा आवश्यकतालाई सम्बोधन गर्ने विद्युतीय हेभी ड्युटी समाधान उपलब्ध गराउन पाउँदा खुसी लागेको उनले बताए।

दुवै मोडलमा चालकको आराम र सञ्चालन प्रभावकारितालाई ध्यानमा राखेर एयर-सस्पेन्डेड सिट, मल्टिफङ्सन स्टेयरिङ, एयर कन्डिसनिङ र ठूलो इन्स्ट्रुमेन्ट डिस्प्लेलगायतका सुविधा राखिएका छन्। साथै, हेभी ड्युटी व्यावसायिक सञ्चालनका लागि आवश्यक सुरक्षा तथा नियन्त्रण प्रणालीसमेत उपलब्ध छन्।

कम्पनीका अनुसार स्याकम्यान एक्स ५००० ई ६×४ इलेक्ट्रिक प्राइम मुभरको मूल्य २ करोड ५ लाख रुपैयाँ र स्याकम्यान एक्स ५००० ई ६×४ इलेक्ट्रिक टिपरको मूल्य २ करोड ३५ लाख रुपैयाँ तोकिएको छ।

यी दुई मोडलको आगमनसँगै जगदम्बा मोटर्सले आफ्नो व्यावसायिक सवारीसाधन पोर्टफोलियोलाई विद्युतीय हेभी ड्युटी सेग्मेन्टमा विस्तार गरेको छ। कम्पनीले नयाँ सवारीसाधनमार्फत नेपालको यातायात, निर्माण, खानी तथा औद्योगिक क्षेत्रमा विद्युतीय मोबिलिटीका विकल्प थप गर्ने जनाएको छ।