काठमाडौं। शिक्षा, कूटनीति, समाजसेवा, साहित्य, सञ्चार तथा अन्तर्राष्ट्रिय सम्बन्धका क्षेत्रमा सक्रिय दिवश घिमिरेले राष्ट्रिय नेतृत्व, सांस्कृतिक कूटनीति र नीति अनुसन्धानमार्फत नेपालको पहिचानलाई अन्तर्राष्ट्रिय स्तरमा स्थापित गर्न उल्लेखनीय योगदान पुर्‍याउँदै आएका छन्। शैक्षिक नेतृत्वदेखि अन्तर्राष्ट्रिय मञ्चसम्मको उनको सक्रियताले नेपाललाई विश्व समुदायसँग जोड्ने सेतुका रूपमा महत्वपूर्ण भूमिका निर्वाह गरेको छ।

शिक्षा प्रशासनबाट आफ्नो व्यावसायिक यात्रा प्रारम्भ गरेका घिमिरेले विद्यालयको उप–प्रधानाध्यापकको जिम्मेवारी सम्हाल्दै विद्यालय व्यवस्थापन, शिक्षक समन्वय, विद्यार्थी नेतृत्व विकास तथा संस्थागत सुदृढीकरणमा प्रभावकारी भूमिका खेलेका छन्। शिक्षा केवल पाठ्यक्रममा सीमित नभई सामाजिक परिवर्तनको प्रमुख माध्यम हो भन्ने विश्वासका साथ उनले शैक्षिक नेतृत्वलाई सामाजिक उत्तरदायित्वसँग जोडेर अघि बढाएका छन्।

घिमिरेको योगदान शिक्षा क्षेत्रमा मात्र सीमित छैन। नागरिक समाजका राष्ट्रिय उपाध्यक्षका रूपमा उनले सार्वजनिक सरोकारका विषयमा आवाज उठाउने, समुदाय केन्द्रित कार्यक्रम सञ्चालन गर्ने तथा नीति निर्माण प्रक्रियामा नागरिक सहभागिता अभिवृद्धि गर्न सक्रिय भूमिका निर्वाह गरेका छन्। शिक्षक संगठन, स्काउट आन्दोलन, विद्यार्थी नेतृत्व तथा विभिन्न राष्ट्रिय तथा अन्तर्राष्ट्रिय संस्थामा आबद्ध रहँदै उनले युवाहरूलाई नेतृत्व विकास, सामाजिक उत्तरदायित्व र शान्ति स्थापनातर्फ प्रेरित गर्दै आएका छन्।

अन्तर्राष्ट्रिय सम्बन्धका क्षेत्रमा पनि घिमिरेको सक्रियता उल्लेखनीय छ। उनले बेलायत, जापान, भारत, चीन, अष्ट्रेलिया, सिंगापुर, मलेसिया, बंगलादेश, थाइल्यान्ड, कतार, म्यानमार तथा युरोपका विभिन्न मुलुकहरूमा आयोजित अन्तर्राष्ट्रिय सम्मेलन, संवाद तथा उच्चस्तरीय कार्यक्रममा नेपालको प्रतिनिधित्व गरेका छन्। ती कार्यक्रममा उनले शिक्षा, व्यापार, लगानी, पर्यटन, प्रविधि, पूर्वाधार, वातावरण, क्षेत्रीय सहकार्य, सांस्कृतिक आदानप्रदान तथा मानव विकासका विषयमा विभिन्न देशका नीति निर्माता, कूटनीतिज्ञ तथा अन्तर्राष्ट्रिय संस्थाका प्रतिनिधिहरूसँग विचार आदानप्रदान गरेका छन्। यसले नेपालको अन्तर्राष्ट्रिय सम्बन्ध विस्तार तथा सहकार्य अभिवृद्धिमा सकारात्मक योगदान पुर्‍याएको बताइन्छ।

सन् २०२४ मा नेपाल–अष्ट्रेलिया सातदिने सांस्कृतिक आदानप्रदान कार्यक्रमको प्रमुख संयोजक तथा मुख्य आतिथ्यकर्ताको जिम्मेवारी पनि घिमिरेले सम्हालेका थिए। अष्ट्रेलियाबाट आएका विद्यार्थी, प्राध्यापक, कानुनविद्, सामाजिक अभियन्ता तथा इन्जिनियरहरूको टोलीलाई नेपाली संस्कृति, परम्परा, समुदाय तथा प्राकृतिक सम्पदासँग परिचित गराउने उद्देश्यले सञ्चालन गरिएको उक्त कार्यक्रम अत्यन्त सफल भएको थियो। विशेषगरी नेपालको प्राकृतिक सौन्दर्य र सांस्कृतिक विविधतालाई केन्द्रमा राखेर सञ्चालन गरिएको क्याम्पिङ कार्यक्रमले सहभागीहरूको उच्च प्रशंसा प्राप्त गरेको थियो। कार्यक्रमको सफलतापछि घिमिरेलाई अष्ट्रेलिया आमन्त्रण गरी दुई देशबीच शैक्षिक तथा सांस्कृतिक सहकार्य विस्तारबारे छलफल गरिएको थियो।

घिमिरे नीति अनुसन्धान तथा लेखनमा पनि सक्रिय छन्। उनले तयार पारेको ‘Beyond Borders: The Lived Realities of Nepali Migrants in Australia and the Road to Stronger Bilateral Support’ शीर्षकको नीति अनुसन्धानले अष्ट्रेलियामा रहेका नेपाली आप्रवासीहरूको रोजगारी, आवास, मानसिक स्वास्थ्य, शैक्षिक प्रमाणपत्रको मान्यता तथा सामाजिक सुरक्षासम्बन्धी चुनौतीहरूको विस्तृत अध्ययन प्रस्तुत गरेको छ। उक्त अध्ययनले दूतावासस्तरीय सहयोग संयन्त्र स्थापना, पूर्व–प्रस्थान अभिमुखीकरण, कानुनी तथा मनोसामाजिक सहायता, श्रम अधिकार संरक्षण तथा द्विपक्षीय सहकार्य विस्तारका व्यावहारिक सुझावहरू पनि अघि सारेको छ।

सञ्चार क्षेत्र पनि घिमिरेको अर्को महत्वपूर्ण कार्यक्षेत्र हो। रेडियो त्रिवेणी एफएममा कार्यक्रम प्रस्तोताका रूपमा उनले शिक्षा, जनचेतना तथा सामाजिक उत्तरदायित्वका विषयमा कार्यक्रम सञ्चालन गरेका थिए भने चितवन पोस्टमा नियमित लेखनमार्फत शिक्षा, संस्कृति तथा सामुदायिक विकासका विषयमा जनमत निर्माणमा योगदान दिएका छन्। तथ्यमा आधारित विश्लेषण, सरल भाषा र समाजप्रतिको उत्तरदायित्व उनको लेखनको विशेषता मानिन्छ।

साहित्य क्षेत्रमा पनि घिमिरेको उल्लेखनीय योगदान रहेको छ। ‘गन्तव्य र पाइलाहरू’, ‘नेपालका चाडपर्वहरू’ तथा स्काउट आन्दोलनसँग सम्बन्धित पुस्तकहरू प्रकाशित गरी उनले नेपाली साहित्य, शिक्षा तथा सामाजिक इतिहासलाई समृद्ध बनाउन योगदान दिएका छन्। साहित्यलाई समाज परिवर्तनको प्रभावकारी माध्यमका रूपमा हेर्ने उनको दृष्टिकोणले नयाँ पुस्तालाई सिर्जनशील सोच र सामाजिक उत्तरदायित्वतर्फ प्रेरित गरिरहेको छ।

उनको बहुआयामिक योगदानको कदरस्वरूप राष्ट्रिय तथा अन्तर्राष्ट्रिय स्तरमा विभिन्न सम्मान र पुरस्कार प्राप्त भएका छन्। भारतको राष्ट्रिय समाज सेवा रत्न पुरस्कार, एसियाज यङ अचिभर अवार्ड, कोरिया स्काउट एसोसिएशन अन्तर्राष्ट्रिय सम्मान, नेपालका पूर्व प्रधानमन्त्रीहरूबाट प्रदान गरिएका राष्ट्रिय शिक्षा तथा साहित्य पुरस्कार, उद्योग मन्त्रालय, स्वास्थ्य मन्त्रालय तथा जिल्ला शिक्षा कार्यालयलगायत विभिन्न संघसंस्थाबाट सम्मानित भइसकेका छन्।

शिक्षा, नीति अनुसन्धान, समाजसेवा, साहित्य, सञ्चार र अन्तर्राष्ट्रिय सम्बन्धलाई एकै सूत्रमा जोड्दै नेपालको प्रतिष्ठा र पहिचानलाई विश्व समुदायमा सुदृढ बनाउन निरन्तर सक्रिय दिवश घिमिरे आजको पुस्ताका बहुआयामिक नेतृत्वकर्तामध्ये एकका रूपमा स्थापित हुँदै गएका छन्।