वीरगंज — अशोक टेमानीले बहुदरमाई नगरपालिका–४ अन्तर्गत डौकैला–बहुवरी चौक क्षेत्रमा घरदैलो अभियानलाई तीव्र बनाउँदै मतदातासँग प्रत्यक्ष संवाद गरेका छन्। जनता समाजवादी पार्टी (जसपा) का तर्फबाट पर्सा क्षेत्र नं. २ का प्रतिनिधिसभा सदस्य उम्मेदवार बनेका टेमानीले स्थानीय बासिन्दासँग भेटघाट गर्दै उनीहरूका समस्या र अपेक्षाबारे जानकारी लिएका हुन्।

घरदैलो कार्यक्रमका क्रममा टेमानीले टोल–टोलमा पुगेर ज्येष्ठ नागरिक, महिला, युवा तथा किसानसँग प्रत्यक्ष कुराकानी गरे। स्थानीयले खानेपानी, शिक्षा, स्वास्थ्य र कृषि क्षेत्रसँग सम्बन्धित आधारभूत समस्याहरू प्रमुख रूपमा उठाएका थिए।

स्थानीयका अनुसार डौकैला–बहुवरी चौक क्षेत्र ग्रामीण भेगमा पर्ने भएकाले आवश्यक पूर्वाधार र आधारभूत सेवाको अभाव छ। सुरक्षित र स्वच्छ खानेपानीको पर्याप्त व्यवस्था नभएको, गर्मीयाममा पानीको अभाव झन् गम्भीर बन्ने तथा कतिपय परिवार अझै ट्युबवेल वा परम्परागत स्रोतमा निर्भर रहनुपरेको गुनासो गरिएको छ।

शिक्षा क्षेत्रमा विद्यालयको भौतिक पूर्वाधार अभाव, शिक्षक कमी तथा गुणस्तरीय शिक्षाको कमीले बालबालिकाको पढाइ प्रभावित भएको अभिभावकहरूले बताएका छन्। राम्रो शिक्षाका लागि टाढाका क्षेत्र वा निजी विद्यालय रोज्न बाध्य हुनुपरेको उनीहरूको भनाइ छ।

त्यस्तै, स्वास्थ्य सेवा पनि चुनौतीपूर्ण रहेको स्थानीयको भनाइ छ। नजिकै पर्याप्त सुविधा सम्पन्न स्वास्थ्य संस्था नहुँदा सामान्य उपचारका लागि समेत टाढा जानुपर्ने अवस्था रहेको र आकस्मिक अवस्थामा यातायात अभावले समस्या थपिने गरेको उनीहरूले बताएका छन्।

कृषि क्षेत्रमा सिँचाइको अभाव, मल–बीउको समयमै उपलब्धता नहुनु तथा उत्पादनको उचित बजार नपाउनु किसानका प्रमुख समस्या रहेको गुनासो गरिएको छ। कृषिमा निर्भर परिवार आर्थिक रूपमा कमजोर बन्दै गएको भन्दै स्थानीयले चिन्ता व्यक्त गरेका छन्।

स्थानीयको गुनासो सुनेपछि उम्मेदवार टेमानीले खानेपानी, शिक्षा, स्वास्थ्य र कृषि क्षेत्र सुधारलाई प्राथमिकतामा राख्ने प्रतिबद्धता व्यक्त गरेका छन्। “म राजनीति गर्न होइन, काम गर्न आएको हुँ,” उनले भने, “जनताको वास्तविक समस्या बुझेर समाधानका लागि स्पष्ट योजना बनाउनेछु।”

टेमानीले पूर्वाधार विकास, रोजगारी सिर्जना, कृषि आधुनिकीकरण तथा शिक्षा–स्वास्थ्य सेवाको गुणस्तरीय विस्तारका लागि विशेष पहल गर्ने बताएका छन्। बहुदरमाई–४ मा सम्पन्न घरदैलो कार्यक्रमसँगै उनले पर्सा क्षेत्र नं. २ का विभिन्न बस्तीमा चुनावी अभियानलाई थप तीव्र बनाएका छन्।