काठमाडौं । अमेरिकी राष्ट्रपति डोनाल्ड ट्रम्पले ब्राजिलको राष्ट्रपति निर्वाचनमा लुइज इनासियो लूला दा सिल्भाले जित हासिल गरे पनि मतगणना प्रक्रियामाथि प्रश्न उठाएका छन् ।

ट्रम्पले लुला आफूलाई मन पर्ने र उनीसँग आफ्नो सम्बन्ध राम्रो रहेको बताए । तर, चुनाव धाँधलीयुक्त देखिएको उनले आरोप लगाए ।

सोमबार पत्रकारसँग उनले आफूले कुनै उमेदवारको पक्ष नलिएको जिकिर गरे । ब्राजिलको चुनाव अर्को धाँधलीयुक्त निर्वाचनजस्तो देखिएको उनले बताए ।

उनले मतगणना र मतदानको समयसीमा बढाइएको विषयलाई ‘असामान्य’ भने । निर्वाचन प्रक्रिया आफूलाई नराम्रो लागेको उनले बताए ।

ट्रम्पले आफू ब्राजिलको नभई अमेरिकाको हितमा केन्द्रित रहेको उल्लेख गरे । उनले चुनावमा धाँधली भएको दाबी पुष्टि गर्ने प्रमाण भने प्रस्तुत गरेनन् ।

ब्राजिलको राष्ट्रपति निर्वाचनमा लूलाले कट्टर दक्षिणपन्थी प्रतिद्वन्द्वी तथा लिबरल पार्टीका नेता फ्लाभियो बोल्सोनारोलाई पराजित गरेका छन् । लूलाले ५१.७९ र बोल्सोनारोले ४८.२१ प्रतिशत मत प्राप्त गरेका छन् । योसँगै लुला चौथो कार्यकालका निम्ति राष्ट्रपति निर्वाचित भएका छन् ।