काठमाडौँ । संसदीय सुनुवाइ समितिले सर्वोच्च अदालतको न्यायाधीशमा नियुक्तिका लागि सिफारिस गरिएका चार जनाविरुद्ध उजुरी आह्वान गर्ने निर्णय गरेको छ ।

असोज २६ गते बसेको समितिको बैठकले प्रस्तावित न्यायाधीशविरुद्ध कात्तिक ९ गतेदेखि लागू हुने गरी १० दिनको समय दिएर उजुरी आह्वान गर्ने निर्णय गरेको हो । समितिका सचिव तुलबहादुर कँडेलले उक्त निर्णयबारे जानकारी दिएका हुन् ।

निर्णयअनुसार प्रस्तावित न्यायाधीशविरुद्ध कात्तिक ९ गतेदेखि उजुरी दिन सकिनेछ । उजुरी दिने अन्तिम मिति कात्तिक १९ गतेसम्म तोकिएको छ ।

समितिका सभापति बोधनारायण श्रेष्ठले न्याय परिषद्को पत्राचारअनुसार सुनुवाइ प्रक्रिया अघि बढाउँदै प्रस्तावित न्यायाधीशविरुद्ध उजुरी आह्वान गर्ने निर्णय गरिएको जानकारी दिए ।

संसदीय सुनुवाइ प्रक्रियाअन्तर्गत उजुरी संकलनपछि प्रस्तावित न्यायाधीशहरूको योग्यता, क्षमता तथा नियुक्तिसम्बन्धी विषयमा आवश्यक अध्ययन गरी सुनुवाइ प्रक्रिया अघि बढाइनेछ ।