काठमाडौं । काठमाडौं उपत्यका ट्राफिक प्रहरी कार्यालयले पछिल्लो २४ घण्टामा ट्राफिक नियम उल्लंघन गर्ने ५२१ सवारी साधनलाई कारवाही गरेको जनाएको छ ।

कार्यालयले सार्वजनिक गरेको पछिल्लो २४ घण्टाको दैनिक ट्राफिक कारबाही विवरणअनुसार विभिन्न प्रकारका ट्राफिक नियम उल्लंघन गर्ने सवारी तथा चालकलाई कारबाही गरेको हो । तथ्याङ्कअनुसार सबैभन्दा धेरै ‘अन्य’ शीर्षकअन्तर्गत ३२३ वटा सवारी साधन कारबाहीमा परेका छन् । त्यसपछि तीव्र गतिमा सवारी चलाउने ६६, हर्नको दुरुपयोग गर्ने ३२, मादक पदार्थ सेवन (मापसे) गरेर सवारी चलाउने ३०, रातो बत्ती (रेड लाइट) उल्लंघन गर्ने २६ र सडक तथा फुटपाथमा पार्किङ गर्ने १९ सवारी साधनमाथि कारबाही गरिएको छ ।

त्यस्तै, यान्त्रिक अवस्था ठीक नभएका १२, अवस्था ठीक नभएका ७ तथा वान–वे उल्लंघन गर्ने ६ सवारी साधनलाई पनि कारबाही गरिएको कार्यालयले जनाएको छ ।

काठमाडौं उपत्यका ट्राफिक प्रहरीले सडक अनुशासन कायम राख्न, ट्राफिक नियमको पालना गराउन तथा सडक दुर्घटना न्यूनीकरण गर्ने उद्देश्यले नियमित रूपमा ट्राफिक अनुगमन तथा कारबाही अभियान सञ्चालन गर्दै आएको जनाएको छ ।