काठमाडौँ । बर्दियामा सिँचाइ विभागको नक्कली कार्यालय खोलेर ठगेको आरोपमा बिहीबार प्रहरीले दुई जनालाई पक्राउ गरेको छ। पक्राउ पर्नेमा बर्दियाको ठाकुरबाबा नगरपालिका–३ घर भएका २४ वर्षीय घनश्याम न्यौपाने र उनकी पत्नी कृपा चौधरी छन्।

उनीहरुले बर्दियाका ठाकुरबाबा नगरपालिका–३ स्थित बगनाह बजारमा रहेको घरमा ‘प्रगन्ना तथा बड्कापथ सिँचाइ विभाग’ नामको फर्जी कार्यालय खोलेर ठगी गरेको प्रहरीको अनुसन्धान निष्कर्ष छ ।

कार्यालय मार्फत कर्मचारी नियुक्ति र मजदुरी काममा लगाउने प्रलोभन देखाएर उनीहरुले ठगी धन्दा चलाएको जिल्ला प्रहरी कार्यालय बर्दियाका एक जना अधिकृतले बताए ।

उनीहरूले सरकारी कार्यालयको छाप र कागजात नक्कली रूपमा प्रयोग गर्ने गरेको भेटिएको छ । प्रहरीले उनीहरू विरूद्ध लिखत सम्बन्धी कसुरमा अनुसन्धान गरिरहेको छ ।