बीरगंज, मंसिर १३ । सीमाक्षेत्रमा भन्सार छली, चोरी–तस्करी तथा अवैध ढुवानीमा कडाइ गर्दै आएको सशस्त्र प्रहरी बल नेपाल, पर्साले पुनः एक महत्वपूर्ण सफलता हासिल गरेको छ। विशेष सूचनाको आधारमा खटिएको संयुक्त टोलीले भारतबाट भन्सार छली गरी ल्याइएका १५० क्यारेट केरा बरामद गरी भन्सारमा दाखिला गराएको छ, जसले सीमा सुरक्षामा सशस्त्र प्रहरीको कार्यक्षमता र प्रतिबद्धतामा थप विश्वास बढाएको छ।

मिति २०८२।०८।१३ गते सशस्त्र प्रहरी बल, नेपाल नं. १३ गण हे.क्वा., पर्साको सूचनामा आधारित रहेर सीमा सुरक्षा गुल्म बीरगंज र बीरगंज भन्सार कार्यालयबाट खटिएको संयुक्त टोलीले बीरगंज महानगरपालिका–१५, भिष्वा स्थित एन.एम.सी. रोडमा रहेको मनिस फ्रुट सप्लायर्स को गोदाममा छापा मारेर अवैध रूपमा भण्डारण गरिएको १५० क्यारेट केरा नियन्त्रणमा लिएको हो। उक्त फलफूल सम्भु कुमार गुप्ताले भारतबाट भन्सार छली गरी ल्याएको प्रारम्भिक अनुसन्धानमा खुलेको सशस्त्र प्रहरीले जनाएको छ। बरामद गरिएको सबै सामग्री आवश्यक कारबाहीका लागि बीरगंज भन्सार कार्यालयमा बुझाइएको छ।

नेपालका किसानहरूले आफ्नै कृषिजन्य उपजको उचित मूल्य नपाईरहेको र बजार भारतीय फलफूल तथा तरकारीहरूले कब्जा गरिरहेको अवस्थामा यस प्रकारको अवैध आयात रोकथाम अत्यन्तै महत्वपूर्ण मानिन्छ। यसैले, सीमा क्षेत्रमा तैनाथ सशस्त्र प्रहरी बल नेपालले भन्सार छली तथा चोरी–तस्करी नियन्त्रणलाई अभियानकै रूपमा सञ्चालन गर्दै आएको छ।

एसपी पुरनचन्द्र भट्टको नेतृत्वमा प्रभावकारी सुरक्षा मोडेल

सशस्त्र प्रहरी उपरीक्षक (एसपी) पुरनचन्द्र भट्टको नेतृत्वमा पर्सा जिल्लामा सीमा अपराध नियन्त्रण कार्य अत्यन्तै व्यवस्थित, प्रभावकारी र परिणाममुखी रूपमा अघि बढिरहेको छ। अवैध ढुवानी, तस्करी, भन्सार छली तथा अन्य सीमा अपराधविरुद्ध भट्टले निर्देशन दिएको टोली निरन्तर सक्रिय रहेको छ, जसको प्रत्यक्ष उदाहरण  केही दिन अगाडि बरामद गरिएको २१३ किलो गाँजा हो।

उहाँको कार्यशैली, सतर्कता, सूचनाको प्रभावकारी उपयोग तथा सीमा सुरक्षाप्रतिको कडा प्रतिबद्धताले सशस्त्र प्रहरी बलको प्रतिष्ठा झनै उचो बनेको छ। स्थानीयवासी, व्यापारी तथा किसानहरूले पनि भट्टको नेतृत्वमा भइरहेको सीमा सुरक्षाको कडाइको प्रशंसा गर्दै आएका छन्।

सशस्त्र प्रहरी बल पर्साले आगामी दिनमा सीमा अपराध नियन्त्रणलाई अझ व्यापक र दिगो बनाउँदै लैजाने, राजस्व वृद्धि तथा किसानको हितको संरक्षणमा निरन्तर योगदान पुर्‍याउँदै जाने प्रतिबद्धता जनाएको छ।

यसरी, अवैध सामग्री नियन्त्रण र राष्ट्रिय राजस्व सुरक्षा अभियन्ताको रूपमा सशस्त्र प्रहरी बल नेपाल, पर्साले फेरि एक उल्लेखनीय उपलब्धि हात पारेको छ, जसले सीमा सुरक्षा प्रवर्धनमा महत्वपूर्ण प्रभाव पारेको छ।