काठमाडौं । माछापुच्छ्रे बैंकले ग्राहकलाई थप स्मार्ट, सहज तथा ग्राहककेन्द्रित बैंकिङ सेवा उपलब्ध गराउने उद्देश्यले नयाँ ग्राहक सेवामुखी च्याटबोट ‘माया’ औपचारिक रूपमा सार्वजनिक गरेको छ।

बैंकको आधिकारिक वेबसाइटमा ‘माया’को आइकन राखिएको छ। ग्राहकले उक्त च्याटबोटमार्फत विभिन्न बैंकिङ सेवासम्बन्धी जिज्ञासा तथा जानकारी च्याटमार्फत प्राप्त गर्न सक्ने बैंकले जनाएको छ।

ग्राहकलाई प्राथमिकतामा राखेर विकास गरिएको ‘माया’ एक अन्तरक्रियात्मक डिजिटल प्लेटफर्म हो। नियमित बैंकिङसम्बन्धी जानकारी लिन शाखा कार्यालय पुग्नुपर्ने वा बैंकका कर्मचारीसँग प्रत्यक्ष सम्पर्क गर्नुपर्ने आवश्यकतालाई कम गर्दै आवश्यक जानकारी सहज र छिटो उपलब्ध गराउने उद्देश्यले च्याटबोट सञ्चालनमा ल्याइएको बैंकको भनाइ छ।

बैंकका अनुसार ‘माया’को सुरुवातले प्रविधिको प्रभावकारी प्रयोगमार्फत थप दक्ष तथा ग्राहकअनुकूल बैंकिङ अनुभव सिर्जना गर्ने बैंकको स्मार्ट बैंकिङसम्बन्धी दृष्टिकोणलाई सहयोग पुग्नेछ।

ग्राहकका जिज्ञासालाई अझ सटीक, सान्दर्भिक र प्रभावकारी रूपमा सम्बोधन गर्न ‘माया’को क्षमता तथा कार्यसम्पादनलाई निरन्तर सुधार र परिष्कृत गर्दै लगिने बैंकले जनाएको छ।

ग्राहकबाट प्राप्त सुझाव तथा प्रयोगबाट प्राप्त अनुभवका आधारमा भविष्यमा च्याटबोटको शुद्धता र उपयोगितालाई थप अभिवृद्धि गरिने बैंकले जनाएको छ।