काठमाडौँ । गत असोज ३१ गतेदेखि प्रदर्शनमा आएको नेपाली चलचित्र ‘जेरी अन टप’ २०८२ सालको सबैभन्दा बढी कमाइ गर्ने चलचित्र बनेको छ । चलचित्र विकास बोर्डअन्तर्गतको ‘बक्सअफिस सिनेपा’का अनुसार यो चलचित्रले गत शनिबारसम्म रु ११ करोड ७१ लाख ४१ हजार ४९८ ग्रस कलेक्सन गरेको छ ।

बोर्डले सोमबार सार्वजनिक गरेको व्यावसायिक तथ्याङ्कअनुसार, यस वर्ष प्रदर्शनमा आएका सबै चलचित्रमध्ये ‘जेरी अन टप’ अग्रस्थानमा रहेको छ ।

चलचित्रका निर्माता सरोज न्यौपानेले दर्शकले दिएको साथ र मायाप्रति आभार व्यक्त गर्दै चलचित्र अझै प्रदर्शनरत रहेकोले आगामी दिनमा यसको कमाइ अझ बढ्ने विश्वास व्यक्त गरे । उनले भने, “हामीलाई वितरकबाट प्राप्त तथ्याङ्क चलचित्र विकास बोर्डकोभन्दा अझ बढी छ । सगरमाथाको विषयमा बनेको यो चलचित्रले घरेलु र प्रवास दुबै बजारमा राम्रो प्रतिक्रिया पाइरहेको छ, जसले नेपाली चलचित्र उद्योगका लागि सकारात्मक सन्देश दिएको छ ।”

यसअघि गत वैशाखमा प्रदर्शन भएको चलचित्र ‘ऊनको स्वीटर’ ले रु ११ करोड ४१ लाख ८८ हजार ७८० कमाइ गर्दै वर्षको सर्वाधिक व्यावसायिक चलचित्र बनेको थियो । तर, अहिले ‘जेरी अन टप’ ले उक्त रेकर्ड तोडेको छ ।

‘जेरी अन टप’ मा अनमोल केसी, आँचल शर्मा, जसिता गुरुङ, भुवन केसी, केदार घिमिरे र उषा खड्गी लगायतका कलाकारको अभिनय रहेको छ । चलचित्रलाई सुयोग गुरुङले निर्देशन गरेका हुन् ।