काठमाडौं । अघिल्लो वर्षको तुलनामा चालु आर्थिक वर्ष २०८३/८४ को पहिलो तीन महिनामा वैदेशिक रोजगारीमा जानको लागि श्रम स्वीकृति लिनेको संख्या बढेको छ ।

वैदेशिक रोजगार विभागले जारी गरेको विवरणअनुसार चालु आर्थिक वर्ष २०८३/८४ को पहिलो तीन महिना (साउन, भदौ र असोज)मा दुई लाख चार हजार २४८ जनाले वैदेशिक रोजगारीमा जान श्रम स्वीकृति लिएका छन् ।

अघिल्लो आर्थिक वर्ष २०८२/८३ को सोही अवधिमा वैदेशिक रोजगारीमा जान विभागबाट दुई लाख ७१६ जनाले श्रम स्वीकृति लिएका थिए ।

विभागका अनुसार, २०८३ असोज महिनामा मात्र वैदेशिक रोजगारीमा जान ६३ हजार ३७७ पुरुष र १० हजार ३८८ महिला गरी कुल ७३ हजार ७६५ जनाले श्रम स्वीकृति लिएका छन् ।

२०८२ असोज महिनामा ५६ हजार ६२५ पुरुष र आठ हजार नौ महिला गरी ६४ हजार ६३४ जनाले श्रम स्वीकृति लिएका थिए । गत वर्षको असोज महिनाको तुलनामा यस वर्षको असोजमा श्रम स्वीकृति लिनेको संख्या ९ हजार १३१ ले बढी रहेको छ ।

विभागको विवरणअनुसार २०८३ साउनमा ७० हजार ४४१, भदौमा ६० हजार ४२ र असोजमा ७३ हजार ७६५ जनाले श्रम स्वीकृति लिएका छन् ।

यस्तै, अघिल्लो वर्ष २०८२ को साउनमा ६८ हजार ११०, भदौमा ६७ हजार ९७२ र असोजमा ६४ हजार ६३४ जनाले श्रम स्वीकृति लिएका थिए ।

आर्थिक वर्ष २०८१/८२ को पहिलो तीन महिनामा कुल एक लाख ७० हजार ५९१ जनाले वैदेशिक रोजगारीमा जान श्रम स्वीकृति लिएका थिए ।