सोलु करिडोरमार्फत राष्ट्रिय प्रसारणमा आबद्ध

सोलुखुम्बु । हिमाली जिल्ला सोलुखुम्बुस्थित ८२ मेगावाट क्षमताको तल्लो सोलु जलविद्युत् आयोजना अब औपचारिक रूपमा राष्ट्रिय ग्रिडमा जोडिएको छ।
सोलु हाइड्रोपावर लिमिटेडद्वारा प्रवद्र्धित यो आयोजना १३२ केभी डबल सर्किट सोलु करिडोर प्रसारण लाइनमार्फत तिङ्ला सबस्टेसन हुँदै राष्ट्रिय ग्रिडमा समावेश भएको हो।

गत साउन ४ गतेदेखि पहिलो युनिटमार्फत विद्युत् उत्पादन परीक्षण सुरू भएको र दुवै युनिट (४१–४१ मेगावाट क्षमताका पेल्टन टरबाइन)को सफल परीक्षण सम्पन्न भइसकेको आयोजनाका सहायक प्रबन्धक कृष्णबहादुर चौधरीले जानकारी दिए।
नेपाल विद्युत् प्राधिकरणले आगामी १५ दिनसम्म परीक्षण सञ्चालन गरेपछि आयोजना व्यावसायिक रूपमा विद्युत् आपूर्ति गर्न थालेको हो।

६ किलोमिटर पेनस्टक र ५ किलोमिटर सुरुङमार्गको चुनौती

सोलुदूधकुण्ड नगरपालिका–७ र ११ को सीमामा पर्ने साल्मेमा बाँध निर्माण गरी करिब ६ किलोमिटर तल तिङ्लाको भदौरेस्थित भूमिगत पावरहाउसमा पानी झारेर ऊर्जा उत्पादन हुने संरचना तयार गरिएको छ।
यसका लागि ५ किलोमिटर लामो सुरुङमार्ग, ६ किलोमिटर पेनस्टक पाइपलाइन र भूमिगत पावरहाउस निर्माण गरी विद्युत् उत्पादनका सम्पूर्ण संरचना तयार गरिएको हो।

निर्माण अवधिभर पहिरो, जलवायुजन्य अवरोध र प्राविधिक चुनौतीका कारण आयोजनाले ठूलो कठिनाइ भोगेको थियो। अन्तिम चरणमा आएको पहिरोले पेनस्टक र अन्य संरचनामा क्षति पुर्‍याउँदा केही संरचना पुनर्निर्माण गर्नुपरेको चौधरीले बताए।

१६ अर्ब लगानीको निजी–अन्तर्राष्ट्रिय सहकार्य

एफएमओसहितका विभिन्न युरोपियन बैङ्कहरूको सहकार्यमा १६ अर्ब रुपैयाँको लगानीमा निर्माण भएको यो आयोजना नेपालको निजी लगानीमा बनेको दोस्रो ठूलो जलविद्युत् आयोजना हो।
यसअघि ८६ मेगावाटको सोलु दूधकोशी आयोजना सञ्चालनमा आइसकेको छ, जसपछि तल्लो सोलु दोस्रो स्थानमा छ।

निर्माण कम्पनीले सेप्टेम्बर २०२५ भित्र परियोजना सम्पन्न गर्ने लक्ष्य राखेको भए पनि निर्धारित समयभन्दा दुई महिना अगावै विद्युत् उत्पादन सुरु गर्नु आयोजना व्यवस्थापनको उपलब्धि मानिएको छ।

८२ मेगावाट विद्युत्, स्थानीय रोजगारी र आर्थिक वृद्धि

तल्लो सोलु जलविद्युत् आयोजनाबाट हिउँदमा न्यूनतम २३ मेगावाट र वर्षायाममा अधिकतम ८२ मेगावाट विद्युत् उत्पादन हुने लक्ष्य छ।
यो उत्पादन सोलु करिडोरमार्फत तिङ्ला सबस्टेसनमा आपूर्ति भई राष्ट्रिय ग्रिडमा प्रवाह भइरहेको छ।

आयोजनाले स्थानीय रोजगारी, पूर्वाधार विकास र आर्थिक क्रियाकलापमा उल्लेखनीय योगदान दिएको छ।
सुरुङ खन्नेदेखि पेनस्टक राख्ने, टरबाइन जडानदेखि पावर हाउस सञ्चालनसम्मका काममा दर्जनौँ स्थानीय युवा प्राविधिक र अप्राविधिक रूपमा संलग्न भएका थिए ।

सोलुखुम्बुको समृद्धिमा नयाँ ऊर्जा

स्थानीय जनप्रतिनिधिहरूले आयोजनालाई सोलुखुम्बुको समृद्धि र पूर्वाधार विकासको मूल आधारका रूपमा व्याख्या गरेका छन्।
विद्युत् आपूर्ति विस्तारसँगै पर्यटन, उद्योग, सेवा क्षेत्र र स्थानीय व्यापारमा थप गति आउने अपेक्षा गरिएको छ।