वीरगन्ज । वीरगन्जमा आयोजित दसैं मेलामा मंगलबार राति दुई समूहबिच भएको ग्याङ फाइटमा एक जनाको ज्यान गएको छ ।
पर्सा प्रहरीका अनुसार मेलामा पसल राख्ने विषयलाई लिएर भएको विवाद चर्किँदा २० वर्षीय गोल्डेन नाम गरेका (पूर्ण परिचय खुल्न बाँकी) युवकको मृत्यु भएको हो ।

प्रहरी प्रवक्ता तथा डिएसपी हरिबहादुर बस्नेतका अनुसार मेलाको सुरुवाती दिनमै गीता मन्दिर नजिक दुई समूहबिच विवाद सुरु भएको प्रारम्भिक अनुसन्धानमा खुलेको छ ।

उक्त विवाद राति हिंसात्मक रुप लिँदा गोल्डेनमाथि भाटोले प्रहार गरिएको थियो । गम्भीर घाइते भएका उनलाई उपचारका लागि नारायणी अस्पताल पुर्‍याइए पनि राति नै मृत्यु भएको प्रहरीले जनाएको छ ।

घटनापछि मेलास्थलमा ठूलो संख्यामा प्रहरी परिचालन गरिएको छ भने झगडामा संलग्न आशंकित व्यक्तिहरूलाई खोजी कार्य तीव्र बनाइएको पर्सा प्रहरीले जनाएको छ ।

दसैं मेलाको सुरुवातमै यस्तो घटना भएपछि स्थानीयवासीमा त्रास फैलिएको छ । प्रहरीले मेला क्षेत्रमा सुरक्षा व्यवस्थालाई थप कडा पारेको जनाएको छ ।