पर्सा, असोज २५। सशस्त्र प्रहरी बल, नेपाल सीमा सुरक्षा चौकी (बीओपी) भिस्वाको टोलीले अवैध रूपमा भारततर्फ लैजाने तयारीमा रहेको करिब दुई लाख रुपैयाँ बराबरको सिखर ब्रान्डका चुरोट बरामद गरेको छ।

असोज २५ गते बिहान करिब ९:५० बजे छिपहरमाई गाउँपालिका–स्थित भिस्वा सिमाक्षेत्रमा नियमित गस्तीमा खटिएको टोलीले उक्त चुरोट बरामद गरेको हो। सीमाक्षेत्र नजिकै एक व्यक्ति मोटरसाइकलमा चुरोट बोकी भारततर्फ लैजाँदै गर्दा सशस्त्र प्रहरीको टोली देखेपछि मोटरसाइकल फालेर फरार भएको सशस्त्र प्रहरीले जनाएको छ।

फरार व्यक्तिले छोडी गएको सो मोटरसाइकलको तलासी गर्दा दुई कार्टूनमा प्याक गरिएको १०० बन्डल सिखर ब्रान्डका चुरोट बरामद गरिएको हो। बरामद गरिएको चुरोटको अनुमानित मूल्य करिब रु. २ लाख बराबर रहेको बताइएको छ।

उक्त अपरेसनको नेतृत्व सशस्त्र प्रहरी निरीक्षक रोशन सिर्नेटले गरेका थिए। निरीक्षक सिर्नेटको कमान्डमा खटिएको टोलीले जोखिमपूर्ण सिमाक्षेत्रमा निरन्तर गस्ती तथा निगरानी गर्दै आएको सशस्त्र प्रहरी स्रोतले जनाएको छ।

सशस्त्र प्रहरीको भनाइअनुसार, सीमा क्षेत्रमा दैनिक रूपमा हुने सामान तस्करी, मानव ओसारपसार र अवैध कारोबार रोकथामका लागि विशेष निगरानी र सूचना–आधारित अपरेसन सञ्चालन गरिँदै आएको छ। यस क्रममा भिस्वा बीओपीको टोलीले पछिल्ला दिनहरूमा उल्लेखनीय सफलता हासिल गरेको बताइएको छ।

बरामद गरिएको सामानलाई हाल बीओपी भिस्वामा ल्याई आवश्यक कानुनी प्रक्रिया पूरा गरी वीरगंज भन्सार कार्यालयमा बुझाउने तयारी भइरहेको सशस्त्र प्रहरीले जानकारी दिएको छ।

सशस्त्र प्रहरी बलका अधिकारीहरूका अनुसार, सीमाक्षेत्रमा सक्रिय विभिन्न समूहहरूले छलछाम गरी विदेशी चुरोट, मदिरा, मोबाइल र कपडा जस्ता सामानहरू भारततर्फ लैजाने प्रयास गर्ने गरेका छन्। तर सशस्त्र प्रहरी बलले पछिल्ला महिनाहरूमा लगातार अपरेसनमार्फत तस्करी नियन्त्रणमा उल्लेखनीय उपलब्धि हासिल गरेको बताइएको छ।

स्थानीय बासिन्दाहरूले पनि सशस्त्र प्रहरीको यस्तो कदमप्रति प्रशंसा व्यक्त गर्दै सिमाक्षेत्रमा अवैध कारोबार र तस्करी नियन्त्रणमा सशस्त्र प्रहरीको भूमिका प्रभावकारी रहेको बताएका छन्। उनीहरूले सीमा क्षेत्रमा थप सुरक्षा निगरानी र गस्ती बढाउन आग्रह पनि गरेका छन्।

यसअघि पनि भिस्वा सिमाक्षेत्रबाट लागूऔषध, पटका, मदिरा र अन्य अवैध सामानहरू बरामद गरी सशस्त्र प्रहरीले नियमित रूपमा कारबाही अघि बढाउँदै आएको थियो। यस घटनाले पुनः सशस्त्र प्रहरीको सर्तकता र अनुशासनप्रतिको प्रतिबद्धता देखाएको स्थानीय प्रशासनले टिप्पणी गरेको छ।

सशस्त्र प्रहरी बलले भनेको छ — “अवैध कारोबार र तस्करी नियन्त्रण हाम्रो प्राथमिक जिम्मेवारी हो। सीमा सुरक्षामा कुनै पनि प्रकारको कमजोरी हुन नदिने गरी हामी दिनरात खटिएका छौं।”

सिमाक्षेत्रमा यसरी सशस्त्र प्रहरी बलको सक्रियता बढ्दै गएपछि सीमामा हुने अवैध गतिविधि घट्ने र स्थानीय क्षेत्रमा सुरक्षाको वातावरण अझ सुदृढ हुने अपेक्षा गरिएको छ।