काठमाडौं । खाद्य प्रविधि तथा गुण नियन्त्रण विभागले भोटेकोशी बाढीपीडितका लागि पठाउन तयारी अवस्थामा राखिएका राहत खाद्य सामग्रीको निरीक्षण तथा अनुगमन गरेको छ।

विभागले २०८३ भदौ २४ गते खाद्य स्वच्छता तथा गुणस्तर ऐन, २०८१ बमोजिम राहत सामग्रीको निरीक्षण गरेको हो। अनुगमनका क्रममा राहतका लागि तयारी अवस्थामा राखिएका खाद्य सामग्रीको गुणस्तर, लेबल विवरण तथा उपभोग्य मिति जाँच गरिएको विभागले जनाएको छ।

अनुगमनका क्रममा खाद्य व्यवस्था तथा व्यापार कम्पनी लिमिटेड, थापाथलीमा फोर्टिफाइड स्टिम जीरा मसिनो चामल, मुसुरो दाल, सूर्यमुखी तेल, आयोनुनलगायत खाद्य सामग्री बाढीपीडितका लागि पठाउन तयारी अवस्थामा रहेको पाइएको थियो।

ती सामग्रीको लेबलमा ब्याच नम्बर, उत्पादन/प्याकेजिङ गर्ने उद्योगको नाम तथा ठेगाना उल्लेख हुनुका साथै उपभोग्य मिति समाप्त नभएको पाइएको विभागले जनाएको छ।

त्यस्तै, राधा स्वामी सत्सङ्ग, सामाखुसीमा चाउचाउ, चिउरा, आयोनुन, सनफ्लावर तेललगायतका खाद्य सामग्री राहतका लागि पठाउन तयारी अवस्थामा राखिएको भेटिएको थियो। ती खाद्य पदार्थको लेबलमा पनि आवश्यक विवरण उल्लेख भएको र उपभोग्य मिति समाप्त नभएको पाइएको विभागले जनाएको छ।

अनुगमनपछि दुवै स्थानलाई राहत खाद्य सामग्री वितरण गर्दा असल वितरण अभ्यास (Good Distribution Practice) अनुसार गर्न निर्देशन दिइएको छ।

विभागका अनुसार अनुगमनको उद्देश्य बाढीपीडितलाई वितरण गरिने राहत खाद्य सामग्री स्वच्छ, गुणस्तरीय, सुरक्षित र उपभोगयोग्य अवस्थामा मात्रै पुग्ने सुनिश्चित गर्नु रहेको छ।

विभागकी वरिष्ठ खाद्य अनुसन्धान अधिकृत डा. बालकुमारी शर्माका अनुसार २०८३ भदौ २६ गते जारी विवरणमा राहत सामग्री राखिएका दुई स्थानको निरीक्षण गरिएको उल्लेख छ। दस्तावेजमा कुल संख्या “तीन (१) वटा” उल्लेख भएकाले उक्त संख्यामा टाइपिङ त्रुटि हुन सक्ने देखिन्छ।