तेल अभिभ । गाजामा जारी युद्ध तथा लेबनान र इरानसँगको युद्धपछिको पहिलो आम निर्वाचनमा इजरायली नागरिकले अक्टोबर २७ मा मतदान गर्दैछन्। निर्वाचनबाट १२० सदस्यीय संसद् (नेसेट) को २६औँ कार्यकालका लागि प्रतिनिधि चयन हुनेछन्।

इजरायलको इतिहासमा सबैभन्दा लामो समय प्रधानमन्त्री बनेका बेन्जामिन नेतन्याहु भ्रष्टाचारसम्बन्धी मुद्दा खेपिरहेका बेला पुनः सत्तामा पुग्ने प्रयासमा छन्। उनको नेतृत्वको लिकुड पार्टी र अति-दक्षिणपन्थी गठबन्धनले विपक्षी दलहरूको यहुदी नेतृत्वको गठबन्धनसँग कडा प्रतिस्पर्धा गर्नुपर्ने देखिएको छ।

निर्वाचनमा कुनै पनि पक्षले स्पष्ट बहुमत हासिल गर्ने सम्भावना कमजोर देखिएको छ। यस्तो अवस्थामा सरकार गठनका लागि साना दलहरूको समर्थन निर्णायक बन्न सक्नेछ। निर्वाचन परिणामले नेतन्याहुको राजनीतिक भविष्यसँगै इजरायलको आगामी घरेलु तथा विदेश नीतिको दिशा निर्धारण गर्ने अपेक्षा गरिएको छ।

इजरायलको केन्द्रीय निर्वाचन समितिका अनुसार १८ वर्ष वा सोभन्दा माथिका करिब ७३ लाख नागरिक मतदान गर्न योग्य छन्। अधिकांश मतदान केन्द्र बिहान ७ बजेदेखि राति १० बजेसम्म खुला रहनेछन्। मतदान केन्द्र बन्द हुने समयमा लाइनमा रहेका मतदाताले पनि मतदान गर्न पाउनेछन्। निर्वाचनका दिन सार्वजनिक बिदा दिइएको छ।

इजरायलमा संसद् प्रवेशका लागि राजनीतिक दलले कम्तीमा ३.२५ प्रतिशत मत प्राप्त गर्नुपर्छ। नेसेटको कार्यकाल चार वर्षको हुने व्यवस्था छ। प्रधानमन्त्रीका लागि कार्यकालको संवैधानिक सीमा तोकिएको छैन।