नेयमार बार्सिलोना फर्किएमा मेस्सी खुशी

Sharing is caring!

बार्सिलोनाका सुपरस्टार लियोनल मेस्सीले ब्राजिलियन स्टार नेयमार बार्सिलोना फर्किएमा आफु सबैभन्दा धेरै खुशी हुने बताएका छन् । स्पेनिस पत्रिकालाई अन्तवार्ता दिँदै मेस्सीले नेयमार फर्किए क्लबको उद्येश्यहरु पूरा हुने सम्भावना थप बलियो हुने बताए ।

२७ बर्षीय नेयमार दुई बर्षअघि बार्सिलोना छाडेर किर्तिमानी रकममा फ्रेन्च क्लब पेरिस सेन्ट जर्मन (पीएसजी) गएका थिए । कुनैपनि हालतमा पीएसजी छाडेर बार्सिलोना फर्कन चाहेका नेयमारको चाहनाले यसपटक पूर्णता पाउन सकेन । पीएसजी र बार्सिलोनाबीच सहमति नमिलेपछि नेयमार आगामी जनवरी सम्म पीएसजीमै रहनेछन् ।

मेस्सीले नेयमारलाई क्लबमा फर्काउन साच्चै प्रयास भयो भएन त्यो आफुलाई थाहा नभएको पनि बताए । ‘नेयमारलाई म क्लबमा चाहन्छु । तर केही मानिस उनको आगमनको विपक्षमा छन् । खेलको स्तर हेर्दा मलाई लाग्छ नेयमार विश्वका उत्कृष्ट खेलाडी मध्ये एक हुन् । उनी हाम्रो टोलीमा हुँदा क्लबको उद्येश्य र सम्भावना बढ्छ,’ ३२ बर्षीय मेस्सले भने ।

मेस्सीले बार्सिलोनाका खेलाडीले नेयमारलाई ल्याउन क्लबसँग आग्रह गरेको भन्ने विषयमा पनि खुलासा गरेका छन् । ‘हामीले हाम्रो विचार प्रस्तुत गरेका हौं । तर उनलाई ल्याउनै पर्छ भनेर दबाब दिएका छैनौं । नेयमार आउँदाको सम्भावनाको कुरा गरेका हौं,’ मेस्सीले भनेका छन् । नेयमारले सन् २०१३ देखि २०१७ सम्म बार्सिलोनामा एक सय ८६ खेल खेल्दै एक सय ५ गोल गरेका थिए । उनले पीएसजीका लागि ५८ खेलमा ५१ गोल गरेका छन् ।

यसैगरी मेस्सीले उनको बार्सिलोनासँगको सम्बन्ध सन् २०२१ सम्म रहेको र त्यसपछि के गर्ने भन्ने विषयमा पनि खुलेर बोलेका छन् । ‘बार्सिलोना मेरो घर हो । क्लबको आवश्यकता र शरिरले भ्याएसम्म म बार्सिलोनामै रहने छु,’ मेस्सीले भने । मेस्सी सन् २००१ मा बार्सिलोनामा अनुबन्धित भएका थिए । 

LEAVE A REPLY

Please enter your comment!
Please enter your name here